WILLEMSTAD.- Promé minister Gerrit Schotte a anunsiá ayera tardi ku tin krísis den su gabinete, i partidonan di koalishon. Esaki a surgi despues ku el a drenta den un reunion ku partidonan di koalishon 1’or di mèrdia kual reunion a tèrminá 4’or.
E punto di krísis ta ku mester respetá akuerdo di gobernashon i ku partido Pueblo Soberano ta para riba ku mester tene kuenta ku e akuerdo di gobernashon. Tambe a papia di mas rèspèt entre e miembronan di koalishon. Manera ta konosí tin un konstante tenshon entre presidente di Staten i parlamentario di MFK, Dean Rozier.
Señor Schotte a bisa ku na momentu ku e reunion a kuminsá ayera, sr. Wiels a bandoná e reunion dor ku e tabatin un otro kompromiso. Ora el a regresá e situashon a eskalá i Wiels a grita ku e lo retirá su ministernan for di e gobernashon aki. Mesora Schotte a informá lider di partido MAN, Charles Cooper ku ta den eksterior. Cooper lo a yama Wiels, kaminda a pidié pa no tuma niun akshon ainda pa ku gobièrnu, pero pa warda pa djabièrnè ora e ta na Kòrsou, nan tres lider di partido ku ta forma koalishon por sinta papia ku otro. Wiels lo a eksedé na e yamada di Cooper.
Señor Schotte a deklará ku e informashon ei e tabatin te ku ayera tardi, i si nada no pasa e lo reuní djabièrnè awor ku e otro dos partnernan di koalishon. Pa loke ta trata e situashon di krísis, Schotte a bisa ku e no a informá gobernadó dje situashon, i lo warda djabièrnè.
MFK NO TA KONTRA ENSEÑANSA GRATIS
Sr. Schotte a nenga ku e krísis ku a surgi ta dor ku konseho di minister no a bai di akuerdo ku e proposishon di minister Monk pa hasi enseñansa grátis. Ayera den Konseho di Minister, minister di enseñansa a presentá ku su proposishon pa hasi enseñansa di fundeshi i tambe avansá grátis pa tur alumno.
Segun Schotte MFK no ta kontra di skol grátis. Pero no tin un fondo pa hasi esaki. Ademas komo gobièrnu ke mira algu struktural. No por pone enseñansa grátis pa un aña i sobrá añanan tin di wak kon ta hasi, òf no tin fondo pa kubri esaki. Na momentu ku minister Monk a presentá e proposishon, a pidi e minister pa bini ku un splikashon mas profundo riba realisashon di e enseñansa grátis.
Schotte a sigui bisa ku pais su finansa ta den krísis i tin di atendé e asuntu aki promé. “No por bai hunga Sanikolas, òf Papa Noel, òf tuma medidanan populista”. Pasobra si hasi esakinan, lo bai na krea défisit den presupuesto di pais.
LEI 80/20
Tambe e lider di MFK, a nenga ku e krísis lo ta tambe pa asuntu di e lei 80/20 ku partido Pueblo Soberano a bin kuné. Segun sr. Schotte e lei aki a keda aprobá den Staten. Aworakí e lei ta serka minister Koeiman ku a kaba di bini for di eksterior, pero ta malu. Asina e minister ta na trabou lo atend’é, kaba p’e kana su kamindanan i pa bai na publikashon di esaki.
KONFERENSIA PRENSA PLANIA
Promé di a anunsiá krísis den gobièrnu, sr. Schotte a bisa ku e rueda di prensa di ayera ku e tópiko: ”Responsabilidat di gobernashon”, nan tabata pendiente pa tené for di djaluna último, 11 di yüni. Pero a disidí di pon’é ayera tardi.
|