Extra | Damen ku plan di invershon di $40 mion den DOK

Damen Shipyards ku plan di invershon di $40 mion den dok | Extra

WILLEMSTAD.- Damen, e kompania Ulandes ku tin operashon di DOKmij na su enkargo, tin plania pa hasi un invershon inisial di $40 mion den e astiero, ku e posibilidat pa un invershon adishonal di $20 mion mas.

Tur esakinan ta parti di e invershonnan ku Damen ta hasiendo i tin intenshon di sigui hasi den DOK pa asina pone esaki den un estado optimal pa ofresé mas i mihó servisio. Esei EXTRA por a komprondé for di un kombersashon i rekorido ku e direktor general di CDM, sr. Jaap de Lange.

Segun sr. De Lange, aktualmente, ta preparando un skema di invershon, ku kálkulo detayá pa kada pòst ku ta bai invertí aden. Na tur, tin espasio pa invertí 40 mion dòler. Ta premirá ku esei lo no ta sufisiente, pero e lo sirbi sí komo un bon base pa por ofresé e klientenan un servisio konfiabel. Sobrá di e invershonnan lo tin ku bini for di ganashi.

Segun sr. De Lange, Damen ta satisfecho te awor ku loke e tin na e DOK di Kòrsou, aunke nan sa ku tin un ruta largu pa bai. Importante ta ku un kompania manera esaki ya no tin influensia polítiko den dje manera ántes. E tin komprenshon ku den pasado Gobièrnu a hañ’é fòrsá di tuma e aktividatnan over. No opstante esei, Damen konsientemente a sòru pa inkluí alto funshonarionan lokal den komisariado di e kompania na Kòrsou. Aktualmente e ta konsistí di 4 Ulandes Europeo i 4 lokal. E konosementu dje dirigentenan lokal ta di sumo importansia.

E invershonnan ku tin den tapara ta entre otro den kompra di dos DOK, di kual unu flotante, tambe lo limpia i pone e shòpnan den kondishonal optimal. A hasi invershon kaba den un sistema sofistiká pa nivelá partinan ora di hasi trabounan den shòp. Mas aleu tin intenshon di desmantelá un dje krannan ku ya no ta funshoná i ku por forma un peliger pa esnan ku ta trafiká riba e tereno. E kran ta propiedat di Gobièrnu i lo ser bendé komo heru bieu.

Durante nos rekorido den DOK nos a haña un splikashon tambe kon e operashon dje trabounan grandi ta bai. Por ehèmpel nos a haña un splikashon rondó di e proseso kon un barku ta drenta DOK, kon ta instalá un kantidat di blòki spesial bou di dje pa stabilis’é i pa finalmente pòmp tur e awa saka for di e DOK pa e barku keda para aden. Ta un proseso ku tin di bai ku basta presishon i ku ta tuma algun ora.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *