ORANJESTAD – Conseho di Minister di Reino (Rijks Ministerraad) -riba sugerencia di minister Blok- a insisti cerca gobierno di Aruba pa involucra CAFT urgentemente, y di un forma completo riba e deal di CITGO pa nan (CAft) por duna nan input riba e deal y asina ehecuta e asina yama analisis financiero.
Asina e vespertino di Corsou Antiliaans Dagblad ta raporta. Blok (cu ta reemplazando colega Plasterk e verano aki) na su turno lo informa Tweede Kamer asina cu CAFT completa su tarea. Asina Blok a informa Tweede Kamer recientemente. Mes momento Blok a informa cu e deal di CITGO no ta cla ainda y consecuentemente no por papia di un reapertura di e refineria. Dia 23 di juni ultimo durante un session den Tweede Kamer, Blok a priminti pa duna nan tur informacion prome cu reces ainda. Pero esey no a bira e caso ainda.
CAFT SU ENVOLVIMENTO
Colegio di supervision financiero di Aruba (CAft) lo, conforme su tarea, analisa e consecuencianan financiero di e deal cera y e dealnan cu falta pa wordo firma, cu bista riba e consecuencia riba e presupuesto y e presupuesto plurianual. “Pa esey, e ta dependiente di e transformacion di e consecuencia financiero di e acuerdonan di gobierno di Aruba den e prome cambio presupuestario pa 2016 y e concepto pa e presupuesto 2017. “Gobierno di Aruba a compromete tambe pa envolve CAft cerca e risico analyse cu ta wordo ehecuta den cooperacion cu CITGO pa presenta tur e risiconan di termino cortico y largo.
ASUNTO DI ARUBA
E desicionan cu gobierno di Aruba tuma y e acuerdonan cu nan lo cera riba e tereno aki, pa loke ta e reapertura, Hulanda ta considera un asunto netamente local di Aruba. “Informacion di e acuerdo mester wordo ricibi di gobierno di Aruba. E ultimo informacion cu tin ta netamente e mesun carta cu gobierno di Aruba a manda pa parlamento di Aruba mes, unda cu a informa cu no ta cla ainda cu e negociacion cu Valero (por cierto den fin di siman NoticiaCla.com a compronde cu esey ainda no ta cla tampoco) y cu tanten cu esey no ta e caso, no por bin parlamento. A clarifica tambe cu gobierno di Aruba no a cera ningun acuerdo comercial cu gobierno di Venezuela.
Bron: NoticiaCla