WILLEMSTAD.- Un grupo basta grandi di siudadano tabata presente na  Waaigat pa e di dos manifestashon di e gruponan di preshon agrupá den  Frente Sivil. Despues di diskurso di dirigentenan di Frente Sivil a  sigui ekspreshonnan popular di hendenan komun i koriente, pero tambe  algun personahe konosí manera Nelson Pierre i asta un èks promé minister  ku despues di hopi aña ku e no ta den funshon mas a keda ku outoridat,  esta Maria Liberia-Peters.

Frente Sivil a pidi tur esnan presente pa marcha bai palasio di gobernador na un forma ordená i einan a hasi entrega di formularionan firmá pa siudadanonan ku ta pidi atenshon di su ekselensia gobernador pa hasi algu. Frente Sivil durante di último lunanan a bin ta pidi atenshon di Parlamento pa asumí su responsabilidat komo representantenan di pueblo.

Frente Sivil a kolektá e promé biaha mas ku 4000 firma i a entregá esakinan na Parlamento. Nan a haña un invitashon pa presentá den Staten pero e trato ku nan a haña, segun e gruponan di preshon, ta leu for di esun korekto. P’esei nan a pidi pa mas tantu hende pone nan firma un biaha mas pa gobernador, Parlamento i gobièrnu realisá ku ta un grupo representativo ta reklamando prinsipalmente algun dje figuranan den e gabinete.

Maria Liberia-Peters a mustra riba e importansia di un entidat manera VDC i kon awendia esaki ta na boka di un i tur anto ku esei por tin konsekuensianan hopi serio pa Kòrsou.

Bron: Extra