WILLEMSTAD.- Bestuurscollege di Sint Eustatius no tabata presente na e kumbre tokante pobresa den Karibe Ulandes, ku a tene na Boneiru djaluna.
E supervishon finansiero agudisá ku gobièrnu ulandes a imponé a pone ku ta imposibel pa e delegashon di Statia kumpra ticket, asina diputado Derek Simmons di Sint Eustatius a laga sa na Ret Karibense. Sint Eustatius ta lucha ku un défisit di presupuesto, pa motibu di esaki por hasi gastu ekstraordinario solamente si gobièrnu ulandes delantá a duna pèrmit p’esaki.
Durante e deliberashon kumbre ku miembronan di Eerste i Tweede Kamer e diputadonan statiano a manda un deklarashon Boneiru, kaminda ta splika pakiko no por a kumpra ticket pa nan delegashon. Pa motibu di Simmons su ousensia su kolega di Boneiru Nina den Heyer a lesa su presentashon. Asina tòg por a pone e partisipantenan di e deliberashon na altura di Statia su posishon i puntonan klave relashoná ku kombatimentu di pobresa.
Miembro di Tweede Kamer di PvdA Roelof van Laar a haña lástima ku e diputadonan di Statia i Saba no tabata presente. El a yama esaki un oportunidat pèrdí. ‘Pobresa ta un problema grandi na e islanan, ku ta grita pa un solushon. E dedikashon i kontribushon di polítikonan lokal ta indispensabel den e materia aki”, segun Van Laar.
Relashon entre Statia i Ulanda ta hopi tenso. Gobièrnu di Sint Eustatius siman pasá a protestá serka Konseho di Minister di Reino i serka promé minister Mark Rutte. E isla ke bira pais outónomo den Reino Ulandes. Meskos ku Aruba, Kòrsou i Sint Maarten. Pero Ulanda no ke kumpli ku esaki.
Bron: Extra
Ki iroonia, Statia ta asina pober ku ni un pasashi no por wordu kumpra siendo den Reino Hulandes. Aserka nan ta wordu reklama ku nan no tabata presente na e kumbre tokante ‘Pobresa’. Einan por ripara ku tur e miembronan di Reino ta fajando, paso si un miembro di famia ta pasando malu, enbes di reklama dune un man. Den e kaso aki duna Statia un man! Por ehempel por a opta pa hasi e kumbre di pobresa na Statia. Otro solushon tabata hasi uso di Video-Voice Conference (p.e. ku Skype i/o otro alternativanan ) trai kada ken su kompiuter/tablet o smartphone sin mester a biaha …….unda e espiritu di koperahon den Reino Hulandes a keda?