Djárason atardi SONA, komo partner di kontrato di Pais Kòrsou enkargá ku konstrukshon di e hospital nobo, i e kontratista prinsipal Ballast Nedam a fungi komo anfitrion pa e delegashon di IPKO ku a bishitá e hospital den konstrukshon na Otrobanda.
E parlamentarionan di Ulanda, Aruba, Sint Maarten i Kòrsou a haña splikashon ekstenso di e konstrukshon kaminda nan a añadí ku te awor e konstrukshon ta riba skema pa entregá e hospital nobo meimei di 2018 di moda ku ora kaba di finalisá sobrá por inougurá esaki fin di otro aña.
Na yegada, un delegashon di SONA i Ballast Nedam a risibí e wéspetnan parlamentario di henter Reino. Minister Zita Jesus-Leito di Salú, Medioambiente i Naturalesa tambe a djòin e seshon.
Den e ket di konstrukshon di Ballast Nedam señor Richard Hart komo komisario di SONA a yama e delegashonnan di Reino bonbiní pa despues señornan Frans Jansen i Mark Harks na nòmber di Ballast Nedam a duna un presentashon di Powerpoint di e proyekto di konstrukshon mas grandi ku a yega di lanta na Kòrsou i ademas finansiá for di fondonan públiko.
Seguidamente pa nan seguridat a parti chaleko i hèlmu pa e rekorido na pia den dos grupo na e diferente nivel i sekshonnan di e kompleho den konstrukshon.
Aki e wéspetnan a haña di Paul Bakker i otro funshonarionan di Ballast Nedam un bon idea di e komplehidat di konstrukshon di un hospital di e embergadura aki ku tur e fasilidatnan adishonal.
Riba e tereno di konstrukshon a bira riparabel atrobe di un forma penoso kon nesesario ta pa remplasá e edifisio di Sehos despues di 160 aña.
Na final di e rekorido diferente di e miembronan di e delegashonnan a ekspresá nan gratitut pa e transparensia ku a demostrá durante e bishita i ku visiblemente a logra progreso den ehekushon di e plannan.
Bron: Extra