Extra | MKP: Komo ku MKP no ta para ketu, e por bai elekshon sin problema

Komo ku MKP no ta para ketu, e por bai elekshon sin problema | Extra

WILLEMSTAD.- Pa Movementu Kousa Promé i sr. Rene Rosalia no tabata un problema pa bolbe prepará pa bai elekshon, esei pa motibu ku for di momentu ku e último elekshon a pasa e organisashon a kontinuá ku su trayektoria di formashon manera semper.

Pa e okashon aki ta djis algun ahuste mester a hasi pa por bolbe bai elekshon. Asina sr. Rosalia a duna di konosé na EXTRA den un entrevista ayera na okashon di entrega di lista pa elekshon di dia 28 di aprel próksimo.

Segun Rosalia, despues di e elekshon di òktober 2016 a sigui un periodo di evaluashon, i ku hopi presishon a evaluá kiko a bai robes i kiko por mantené i fortifiká. Tin hendenan djafó tambe ku a duna nan remarkenan, sugerensia i krítikanan konstruktivo na e organisashon. I a hasi uso di e totalidat ei pa yega na e strategia nobo pa e próksimo elekshon ku en prinsipio lo mester a tuma lugá na aña 2020. Teniendo kuenta ku e situashon ei, e promé kongreso statutario tabata programá pa luna di mei awor. Pero gobièrnu a kai i a anunsiá elekshon nobo, i esei a pone ku MKP mester a kambia su strategia mesora i inkluí mesora tambe elekshon den dje.

Esei a trese kuné ku e puntonan ku a pone komo esnan ku tin di traha riba dje a adelantá riba nan. Awor ta bai entregá lista. I manera a hasi biaha pasá, awor kada hende lo bai traha nan propio lista di hendenan pa bai duna sosten pa por bai elekshon.

Pa loke ta e programa di akshon segun Rosalia esaki lo keda meskos ku biaha pasá, solamente lo tin puntonan aden ku lo bai enfoká mas riba nan. Por ehèmpel, lo duna su punto di bista skèrpi riba e sistema elektoral di Kòrsou. E ta algu ku lo tin di kambia drástikamente sino lo keda haña e situashonnan ku a surgi aworakí unda hende ta bandoná partido ku asiento, e parti di korupshon ku a keda i asta bira pió. Pero MKP den su programa di formashon ta proponé pa bini ku un instituto di integridat, subi outoridat di SOAB i di Kontrolaria General, bini ku mas entidatnan ku ta hasi kontrol kontra korupshon.

Pa loke ta e lista pa elekshon sr. Rosalia a splika ku e lo ta balansá i a base dje mesun filosofia di òktober 2016. Ta un lista di hendenan ku tei awe pero ku mañan si ta nesesario nan por kontinuá ku e trabou. E lista ta konsistí di hendenan di tur edat. Miembronan di e movementu aki ta traha den tim, ku ta masha importante. E biaha aki un 20% di miembronan ta kara nobo.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *