Extra | PNP: “Un silensio ta bal mas ku mil palabra”

“Un silensio ta bal mas ku mil palabra” | Extra

WILLEMSTAD.- Partido Nashonal di Pueblo lo no bai enfoká muchu den e periodo di kampaña aki riba e partida di sra. Suzy Camelia-Römer, sino ku PNP lo keda ku su enfoke pa e loke el a ser lantá, ku ta pa traha p’e pueblo. Un silensio ta bal mas ku mil palabra!

Esei tabata e promé reakshonnan di sr. Humphrey Davelaar, lider polítiko di PNP, ayera na okashon di entrega di lista pa elekshon di dia 28 di aprel próksimo.

Segun Davelaar, e partido lo sigui traha pa emansipashon dje pueblo, pa sigui traha i keda presentá hendenan ku por sirbi e pueblo aki di un manera serio i responsabel.

Manera ta konosí, literalmente algun dia promé ku entrega di lista un dirigente di promé órden i di peso den persona di sra. Camelia-Römer a bandoná filanan di e partido a konsekuensia di un disputa riba liderazgo di partido pa elekshon. Den e elekshon di òktober 2016 Camelia-Römer a optené kasi mitar dje votonan di e partido i a drenta Parlamento ku votonan preferensial. Esaki tabata motibu pa un grupo di miembronan aserka direktiva ku un petishon pa reuní riba e punto ei. Nan tabata deseá pa Camelia-Römer ser presentá komo ‘lijsttrekker’ i laga Davelaar komo lider polítiko pa asina por optené mas voto. Pero aparentemente no a duna oido na nan petishon, loke tabata sufisiente motibu pa Camelia-Römer a kibra ku e partido bèrdè.

Segun Davelaar, e no ta nenga ku tin sierto inkunbiniensianan a sosodé den partido, pero a kana un trayekto, i e ta hasi doló naturalmente. Pero PNP a bai sinta, reflekshoná i akapará e forsanan nesesario, buska e sabiduria di ariba pa por kontinuá ku e partido ku Doktor a funda.

“E partido aki tin un kousa, i esei ta pa traha pa e pueblo. Un silensio ta bal mas ku mil palabra”, asina el a opservá agregando ku ta kosnan interno di partido ku e ta preferá di no diskutí den publisidat. I e lo sigui traha pa eliminá divishon no solamente den partido pero den e komunidat den su totalidat. Mester tin union den forma duradero. Tin kosnan ku por evitá, pero mester realisá tambe ku tin kosnan ku ta pasando den pais unda nos mes komo pueblo no por kontrolá si no buska sabiduria djariba.

Bron: Extra

2 Reacties op “Extra | PNP: “Un silensio ta bal mas ku mil palabra”

  1. Net aan

  2. Abraham Mossel

    PNP 29 april 1 zetel

Geef een reactie

Het e-mailadres wordt niet gepubliceerd. Vereiste velden zijn gemarkeerd met *