…Focus riba bruselas pa saka benefisio pa Korsou …

WILLEMSTAD.- Anthony Begina, minister plenipotensiario suplente nobo ta bai focus riba Bruselas ku e meta pa Kòrsou por saka mas probecho di areglonan eksistente ku por benefisiá e pais aki.

Na di dos lugá e ta bai konsentrá riba aktividatnan di komersio posibel entre Kòrsou i Oropa. Riba e pregunta kiko ta para ku implementashon di rekomendashonnan den tres diferente rapòrt riba e minister plenipotensiario Marvelyne Wiels, Begina a bisa EXTRA ku esei no ta su tarea. ‘Mi no tin niun enkargo pa atendé e asuntunan ei”.

Djarason último Begina a huramentá dilanti di su ekselensia gobernador Lucille George-Wout. Den un kombersashon ku e minister plenipotensiario suplente el a duna di konosé ku e ta mucha di e bario Charo di mayornan Vi i Chia. Ambos di famia di piskadó. El a lanta na Caracasbaai unda su tata tabata hefe di duana pa despues bai biba na Charo i na 1973 el a bai Ulanda. Pues e tin hopi aña pafó di Kòrsou.

Su promé funshon tabata na Antillenhuis. El a traha 30 aña den sektor di agrikultura. Ta einan el a haña su eksperensia ku Bruselas speshalmente e reglanan den sektor di agrikultura. El a traha den diferente sektor. Ultimo 25 aña den e organisashon el a pasa den tur departamentu kaminda a konstatá problema serio. El a bai profundisá den buska solushon pa problemanan i kaminda ta nesesario reorganisá.

Begina a bisa ku for di e tempu ei nunka el a hasi mesun trabou mas largu ku 2 aña. For di 2006 e ta riba su mes i den e kuadro aki el a sirbi den diferente instansia rònt Antia e.o komo direktor interino na departamentu di enseñansa i komo kwartiermaker den prizon. Tin hopi diskushon últimamente riba funshonamentu di e minister plenipotensiario. Tin dos rapòrt ku ya kaba ta publiká i tin un di tres ku EXTRA mes a informá detayenan di dje.

Riba esaki Begina a bisa ku e no por bisa nada, simplemente no ta loke partido PAR a negoshá pe. El a haña tarea spesífiko i esei ta atendé loke e tin bon konosementu di dje ku ta eksplorá posibilidatnan konkreto na Bruselas pa Kòrsou i tambe konsentrá riba aktividatnan di komersio entre Kòrsou i Oropa.

Begina ta konsiente ku no tin hopi tempu i p’esei mes e ta bai konsentrá riba e dos puntonan aki i ora ku minister plenipotensiario Wiels no tei e lo aktua komo suplente. El a enfatisá ku Bruselas tin hopi posibilidat pa desaroyo duradero. Esaki ta momento pa krea produktividat pa Kòrsou. Echo ta ku tin petishon di Kòrsou kanando na Bruselas i awor e ta bai atendé esaki. Porsierto djabièrnè awor lo tin un reunion ku su kolega minister di desaroyo ekonómiko i su ministerio riba asuntunan relashoná ku Bruselas.

Otro área sumamente interesante ta e programanan di Bruselas pa empresarionan nobo, e asina yamá ‘startups’. Begina ta bai hinka esfuerso pa logra konekshon entre hubentut inteligente di Kòrsou ku Oropa. Anthony Begina ta bai focus riba trese hende huntu pa pensa i tambe pa nan produsí aktividat pa Kòrsou.

Bron: Extra