WILLEMSTAD.- Lo mester bai kòrta tambe den gastunan na Tele-Kòrsou, asina direktor di UTS Paul de Geus a bisa e siman aki relashoná ku e desaroyonan na e kompania di televishon. E kompania te ainda ta un supsidiario di UTS.

Te ku aña pasá ainda tabatin intenshon pa pasa e kompania bèk pa gobièrnu i tabata plannan avansá den e direkshon aki. Pero despues a wanta e plannan i a disidí ku e kompania lo sigui kai bou di UTS. Meskos ku UTS mes ta bou di preshon di merkado, esei ta konta tambe pa Tele-Kòrsou.

E kantidat di benta di propaganda a bai atras konsiderablemente, no pasobra e kompania tin un programashon i produkto ku no ta bon, pero simplemente pasobra e merkado no ta duna mas awor aki. Meskos ku otro medionan di komunikashon, televishon tambe ta pasando den momentunan difísil pa motibu di un ekonomia ku no ta bai dilanti, preisnan abou ku ta ofresé riba merkado i e kompetensia di retnan sosial.

Informashonnan ku EXTRA a haña ta bisa ku pronto e trahadónan di e kompania tambe lo haña un pakete atraktivo di retiro pa asina baha gastu. Si e pakete no generá e loke mester spar lo mester pasa pa retironan obligatorio, asina EXTRA a komprondé.

Den pasado UTS a usa e mesun fórmula pa su operashon kaminda a baha hende den promé instansia ku un pakete ku bon insentivo. Hopi trahadó a hasi uso di e pakete aki. Aña pasá e kompania a keda di bolbe bin ku un buèlta pa atendé ku e parti laboral, pero esei no a tuma lugá. Definitivamente esei lo tuma lugá e aña aki si. “No tin otro alternativa”, asina De Geus a bisa.

Meskos ta konta awor aki pa Tele-Kòrsou kaminda lo mester bai atendé e situashon. De Geus papiando riba e situashon di e planta e siman aki a bisa ku e merkado di televishon no ta pasando den su mihó momentu. “Henter e merkado di medionan di komunikashon ku kompetensia di Facebook, Google i Twitter, YouTube ta pone ku hendenan ta bayendo den e direkshon ei. E entradanan ku nos tabata haña ántes tambe a baha. Den e kuadro aki Tele-Kòrsou ta un área ku lo bai haña hopi atenshon.

For di aña pasá nos a kuminsá hiba kombersashon pa motibu di e gastunan ku ta basta haltu. Einan tambe mester bai baha gastunan di personal. Den e kuadro aki pa Tele-Kòrsou tambe 2017 lo no un aña masha fásil pero nos ta mir’é ku positivismo. Nos ta spera di logra i realisá e kosnan ku nos kier realisá”, asina De Geus ta bisa.

Bron: Extra