WILLEMSTAD,- Lo atendé ku retiro di trahadónan di InselAir ku urgensia. Asina minister di Desaroyo Sosial, Labor i Bienestar Hensley Koeiman a splika ayera.
Koeiman ta reakshoná riba notisia ku un kantidat bastante grandi di trahadónan di InselAir a entrega retiro boluntario. Koeiman a splika ku su ministerio te ainda no a haña petishon pa atendé ku e trahadónan di InselAir. ‘Pero si nos haña e petishon, nos komishon di retiro lo traha riba esaki inmediatamente.’
EXTRA a komprondé ku algu mas di e 130 trahadónan ku tin di baha, a entregá petishon pa retiro boluntario. Dia promé di ougùstùs awor lo mester baha e trahadónan aki. Tim di maneho di InselAir resientemente a pone un oferta riba mesa pa esnan ku ta deseá por bai ku retiro boluntario. E oferta ta enserá ku nan lo haña Sesantia, un luna di terminashon i fakansi. E intenshon ta pa medio di e medida aki InselAir yega na 180 empleado pa sigui operá e kompania den su estado aktual.
Awe tardi sindikato ke informá tur trahadónan tokante situashon aktual. Asina Wendell Meulen, presidente di sindikato UGTK/CADMU a splika ayera. Na su opinion ta nesesario ku trahadónan ta haña mas garantia for di InselAir ku nan lo haña nan sesantia ora nan ta bai di akuerdo ku un retiro boluntario. Meulen ke invitá tur e trahadónan pa un reunion pa duna tur hende e mesun informashon.
Bron: Extra