WILLEMSTAD,- Minister di Desaroyo Ekonómiko Steven Martina djabièrnè anochi a sera konosí ku Sr. John W. Burcham di Waterfront Hotèl Group, ku ta invershonista i kumpradó di Hotèl Plaza & Casino.

Segun Martina, ku a deliberá ku sr. Burcham na aeropuerto di Kòrsou: ‘Nos a papia riba e futuro plannan pa ku e hotèl. Nos a keda sumamente satisfecho di e intenshonnan pa hasi sierto renovashon. Tambe ke habri e portanan di e hotèl, mas rápido ku ta posibel, atrobe.’

Tambe Martina a bisa ku e perspektivanan ta mustra asina ‘ku Plaza Hotèl ta bai floresé atrobe.’ Segun Martina e kadena potensial ku a ser menshoná dor di e invershonista ta Hilton Double Tree.

Manera ta konosí e Merikano John Burcham djaweps pasá a kumpra Plaza Hotèl pa 16.2 mion florin, ku ta 9 mion US Dòler. Gobièrnu di Kòrsou ta keda doño di Boogjes ku ta pega ku eks-Plaza Hotèl.

Resientemente korte a deklará e hotèl i kasino fayit, ku esaki 50 trahadó a pèrdè nan trabou. Despues a pone e hotèl na benta. SVB i Ontvanger a pone inventario di e hotèl tambe na benta p’asina kubri debe atrasá ku e hotèl tabatin na e instansianan aki. Dia 26 di Yüli lo bende e inventario di e hotèl i di e kasino.

Bron: Extra

Señal positivo ku operador nobo di Plaza Hotel ke habri mas pronto posibel

Señal positivo ku operador nobo di Plaza Hotel ke habri mas pronto posibel

WILLEMSTAD.- Presidente di Sindikato Horecaf sr. Kenneth Valpoort a duna di konosé ku despues di tur e turbulensianan ku ta tin un tras di otro ku Plaza Hotel, tin un lus riba horizonte. Por hasi menshon di un speransa, esta un señal positivo ku e operador nobo di Plaza Hotel ke habri e hotèl mas pronto posibel.

Valpoort a duna di konosé ku nan ta hopi kontentu ku e desaroyo ku tin aktualmente pa ku benta di Hotèl Plaza,

E aspekto ku Valpoort ta reakshoná ariba, ta e echo ku e operador nobo tin plan di kuminsá operá e hotèl mesora i no tin plan pa tene e hotèl será pa tempu largu.

E loke ku e operadó lo hasi ta renobá e hotèl den fase i asina e hotèl lo por bira operashonal mas lihé posibel.

Valpoort a splika ku nan di Horecaf tabatin kombersashon kaba ku sierto personanan pa por empleá esnan ku tabata traha na e hotèl aki kaba, promé.

Tin tur indikashon ku e espektativa ta positivo i nan ta kere ku e intenshon di e doño nobo ta serio.

Valpoort ta hasi un apelashon na tur hende pa di un manera òf otro tin vínkulo pa Hotèl Plaza bira operashonal mas pronto ku hende mester bai traha duru pa por restablesé pa pone e hotèl aki den un kondishon ku tabata un tempu e orguyo di Kòrsou.

E hotèl mester yega na e nivelnan ku tur hende ta deseá i ofresé e produkto turístiko riba nivel haltu pa sigui atraé turistanan pa Kòrsou.

E doño nobo ta individual i tin bon kontakto ku e kadena ku ta operá Hilton.

Bron: Extra

Mester hasi algu purá paso trahadónan ta pèrdiendo trabou

WILLEMSTAD. – No ta promé biaha Presidente di e sindikato Horecaf ta ekspresá su preokupashon pa ku e sektor turístiko. Djasabra tras di lomba un biaha mas Valpoort durante nan programa radial a duna di konosé ku mester hasi algu purá, pa motibu ku trahadónan ta pèrdiendo trabou.

Valpoort a enfatisá ku nan a señalá e situashon aki basta dia kaba, ora e ta mira kuantu trahadó ta pèrdiendo trabou.

E pregunta ta, Kiko ta pasando den e sektor aki, ta un di e aspektonan inkomprendibel pa Valpoort.

Un sektor ku a primintí ku turismo tin futuro aden, anto ora para ketu, ta tuma nota kon poko poko, pero sigur trahadónan un tras di otro ta pèrdiendo trabou.

Mester tuma medida rápido pa rekuperá e pèrdidanan di kupo di trabou ku tin.

Algu mester sosodé, mester sinta huntu pa trese algu riba mesa pa evitá ku mas hende ta pèrdè trabou.

Hopi biaha ta ekskluí representantenan di trahadó, for di reunionnan ora ta traha plan pa desaroyo di turismo. Ta parse ku e aporte di representantenan di trahadó, no tin balor o sea ku nan lo no por yuda ku nada i ta tene nan afó. Esei ta di lamentá.

Otro aspekto ku Valpoort a trese dilanti ta e registrashon na ‘Banko di Vakatura’. Valpoort ta rekomendá tur trahadó ku pèrdè trabou pa bai banko di vakatura pa registrá einan, pa ora tin mester di trahadó, nan por ta e proménan pa haña trabou i evitá asina ku e operador tin di buska trahadó djafó.

Valpoort a bisa ku tin diferente forma pa ku aserkamentu pa por yuda un hende haña trabou.

Por ehèmpel, banko di vakatura tambe por bin ku aserkamentu, manera nan sa ku Plaza Hotèl a sera. Lo ta bon pa Banko di Vakatura riba nan mes inisiativa pa aserká PZ di e hotèl i pidi nan un lista di tur e hendenan ku a pèrdè trabou.

Di e forma aki Banko di Vakatura sa kuantu kòki a pèrdè trabou, kuantu waiter etcetera a pèrdè trabou.

Pues Banko di vakatura tambe por ta pro aktivo i importante ta ku trahadónan tambe mester bai.

Bron: Extra