Vigilante | Lilo Sulvaran: ‘Dick Drayer a insultá tur periodista na Kòrsou’

Komentario: Den un artíkulo riba e sait dje medio di komunikashon na Ulanda ku yama NOS, tin un artíkulo grandi poné unda e reportero kontroversial Dick Drayer ta splika ku “reportahe investigativo na Kòrsou ta den sapatu di mucha”.

Dick Drayer | Foto Vigilante

Dick Drayer | Foto Vigilante

Ku esaki Drayer ta splika ku periodismo na Kòrsou no ta na nivel miéntras e ta elogiá su mes den e artíkulo unda e ta papia di un investigashon ku el a hasi riba Marvelyne Wiels. No ta promé biaha den su karera ku Drayer ta insultá prensa lokal, unda e ta krea e impreshon ku te ta e mihó reportero na Kòrsou.

Drayer, riba Wikipedia hasta tin poné ku na 2008, el a sali reportero di aña. Fo’i unda el a sali ku esei ta un misterio pasobra te asina leu ku Vigilante ta na altura di dje, na Kòrsou no tin NIUN institushon establesé ku rekonosementu pa premia periodismo na Kòrsou. Ku otro palabra, Drayer ta buska elogio falsu. Drayer a bisa ku reporteronan di Kòrsou tin miedu di skibi bèrdat pa miedu di represaya.
Drayer, den temporada ku Radio Wereld Omroep a yega Kòrsou, nan a krea un impreshon ku awor tin periodismo na Kòrsou. Radio Wereld Omroep ku hinter Drayer su redakshon no a sobrebibí ni sikiera 2 aña lagando Drayer atras awor trahando part time pa un kantidat di medio di komunikashon na Kòrsou, pasobra si e tabata bon manera e ta pretendé lo ta na UN medio di komunikashon lo e ta traha meskos ku tur sobra reportero di kalidat na Kòrsou.

Pero, Drayer a bin resultá na Kòrsou, pensando ku e tin derechi di komentá riba kalidat di periodismo na riba nos isla. Si Drayer lo a respetá un tiki mas, lo el a siña di su koleganan manera e.o. Oscar van Dam, un señor kabayero kende si meresé tur klase di elogio i rèspèt den komunidat.

Asina tin mas reportero kendenan a bini Kòrsou i mustra rèspèt sin nunka kai den polémika.
Dick Drayer tin di siña ku ora bo pidi pa awa seru, bo tin atendé ku’e lodo! Drayer ta nada mas ku un reportero den lodo sushi, ku riba e kaminda di bundansia i awa seru di Kòrsou, lo keda bentá den banda mané lodo. P’esei mester trat’é manera lodo sushi tambe. Anto nos tur sa ora lodo seká e ta bira tera i bientu lo zuai e di ost pa nort, sali di nort kwe sùit te dia e pèrdè. Vigilante sigur, no ta aseptá pa NIUN reportero ni instansha papia malu di prensa en general aki riba nos suela.

Pero Drayer ta bai mas lew. No ta pòrnada, kada biaha Dick Drayer ta den diskushon. E ta busk’é konsientemente manera den kaso warda espaldanan di Marvelyne Wiels. Drayer a kore bisa ku nan a agredié. E ta kai den ròl di víktima pe por hala atenshon. Drayer su debilidat ta su sed pa rekonosementu buskando elogio falsu.
Bisando ku periodismo na Kòrsou ta den sapatu di mucha, Drayer ta kere di por a alabá su mes riba tur sobra. Na Kòrsou tin periodista, trahando mas ku 40 aña den e ramo ku nos konosé den nos 20 aña den e trabou, ku NUNKA a ni kuestioná kalidat di prensa na Kòrsou. Entre nan tin sabionan dje ofishi ku ni nan “feter” sr. Drayer no por mara. Dick Drayer ta un bèrgwensa pa Kòrsou, un bèrgwensa pa nos periodismo.
Drayer ta skibi riba blognan unda tin apénas 400 pa 600 lesadó ta lesa. Einan e ta mustra su sentimentu di superioridat den su trabou riba demas koleganan yu di Kòrsou. Dryer ku su ponensha ku “reportahe investigativo na Kòrsou ta den sapatu di mucha”, a insultá mas ku 400 obrero den prensa. Awor ta bai wak ta ku kwa kara, Drayer tei sinta den nos seno na rueda di prensa mei mei di esnan kende el a bagatelisá i mustra ku segun su pensamentu, nan ta inferior den nan trabou i tin miedu di relatá notisia.
Drayer a bai leu, i falta rèspèt pa e yu di Kòrsou. No solamente den prensa, sino den otro gremio tambe. Drayer su artíkulonan ta wòrdu publiká alabes riba e korant rasista “Knipselkrant” ku ta krítika TUR yu di Kòrsou ku no ke pensa kolonial mas. Ei riba tin un “blog” ku yama “E guera pa poder na Kòrsou”.

Yunan di Kòrsou den e komentarionan ta wòrdu yamá tur sorto di kosnan degenerante i Drayer no ta distansha su mes for di e korant digital tampoko. Ta yama yunan di Kòrsou tur nòmber, inkluso “porko sushi”. Kalke periodista respetá lo demanda Knipselkrant pa baha nan artíkulonan òf imáhen abou, pa evitá asosiá nan mes ku rasismo.

Drayer ta un persona kontroversial den nos komunidat ku ta reflehá sentido di superioridat riba otronan. E ta yora tras dje kortina ku ta pa su trabou no ta gust’e, miéntras e realidat ta mustra otro. No ta gust’e pasobra su trabou ta sushi, mes sushi k’e lodo kant’i kaminda.

E ta tipo di hende ku ta mira yu di Kòrsou komo bobo, komo hende ku bo por skibi i bisa tur kos di nan, sin ku nan no por bisa nada bèk. Miéntras su bobedat ta reflehá den su ignoransha.

Si e tabatin un poko mas sabiduria lo el a mester a siña kon pa sobrebibí riba un merkado di prensa na Kòrsou, asina kisas lo e por a yuda radionan manera Wereld Omroep mas mihó, of kisas esnan rasista di Knipselkrant. Drayer a subi un pasiyo ku awor no tin manera di DRAY bek……ni maske kiko e trata na hasi na limpia e lodo ku e ta biba aden.

Lilo Sulvaran
Hefe Redakshon Vigilante

Bron: Vigilantekorsou

Geef een reactie

Het e-mailadres wordt niet gepubliceerd. Vereiste velden zijn gemarkeerd met *