Vigilante | Hustisia Hulanda-Kòrsou ke sera kaso labamentu di miónes

mr. van Gils, mr. Vaders, mr. Lodewijks, mr. Kostrzewski, mr. Murray i mr. Wilsoe

Punda—Un investigashon kombiná entre Hulanda i Kòrsou, e dianan aki ta tratando na haña e último detayenan pa riba 14 di yüni próksimo sera un kaso di labamentu di plaka. Ta trata di un investigashon kual a inisiá ofishalmente for di 6 di yüli 2015, unda un grupo di komersiante na Kòrsou i na Ulanda a via Venezuela a logra laba riba 320 mion dòler.

E kaso aki no ta nada nobo, pero debí ku korte na Ulanda i na Kòrsou, riba 14 di yüni próksimo lo trat’é, funshonarionan di RST a ehersé algun redada ayera na e.o. ofisina di KPMG. KPMG ayera a koperá mesora ku e investigashon i duna tur detaye i dokumentonan nesesario na e funshonarionan. Kontrali na lokual tabata sirkulá ayera, KPMG NO ta forma parti di e investigashon ni tampoko ta sospechoso den e kaso. Ta trata di un kliente fo’i dje konsorsio liga sea dirèkt òf indirekt di tiendanan Monterrey, kende tabata kliente di KPMG temporada e akountent yu di Kòrsou G.S., tabata traha einan. G.S. Tampoko no ta sospechoso den e kaso, pero temporada e tabata na KPMG e tabatin unu dje klientenan ku RST ta mas interesá aden. Dia e akountent a bandoná KPMG alrededor di 10 aña pasa, el a bai tambe ku e bolsa dje kliente.

Manera menshoná no ta un kaso nobo. 23 di yanüari último, ya kaba Korte a duna un tratamentu preliminar dje kaso. 14 di yüni próksimo, e kaso lo wòrdu tratá den seno di un batayon di abogado, akusadonan i kisas testigunan tambe ku tin di presentá pa duna mas aklarashon. Cymbal i Troya, a tuma mas di 4 aña pa yega korte, debí na e struktura kompliká i diferente trayekto di sèn. Tabata riba 6 di yüli 2015 ku por fin hustisia a opta pa inisiá e listramentu i investigashon físiko den e kaso. Riba e dia en kestion, tim di reshèrshi di huntu ku Ulandesnan ku ta forma Combi team a realisá vários entrada hudisial aki na Kòrsou. Combiteam ta outoridatnan Hulandes i tambe reshèrshinan ku ta forma parti di FIOD team esta e parti di Fiskal ora ta bai tokante di investigashon di plaka. E operashon tabata kontra di personanan ku tabata laba plaka na gran eskala prosedente di krímennan, froude, falsifikashon di dokumento i tambe kambiamentu di plaka sin tabatin e pèrmit nesesario pa por a hasi esakinan. Tabata trata di un investigashon di basta ratu entre outoridatnan lokal i esnan Hulandes. Esnan sospecha den e kaso aki tabata swaip ,esta pasa karchi Venezolano ku tabatin riba dje pa nan final haña e suma ku a ser di swaip ku e karchi paga na dòler efektivo. E suma di dòler ku e sospechosonan tabata haña den nan poder tambe tabata bini for krímennan bon organisá. Durante di e investigashon riba 6 di yüli 2015 a bishita no ménos di 9 adrès na unda a logra di detené 4 sospechoso. Durante di e redadanan a konfiská un kantidat konsiderabel di mashinnan di swaip ku tabata ser usa pa pasa e karchinan i tambe a konfiská mas ku shen karchi di krédito venezolano ku tabata wòrdu di swaip. Tambe a konfiská vários shen mil florin i tambe e parti atministrativo di e diferente negoshinan na unda a tene e entradanan hudisial. Durante di e investigashon a konfiská vários propiedat i tambe kuentanan bankario di esnan ku a ser detené den e kaso aki. Henter e operashon den ámbos kaso ta bai simultaniamente ku Hulanda.

Ministerio Públiko na Ulanda i Kòrsou ke kita mas di 20 mion for di un total di 5 sospechoso ku a keda den e kaso. Ta trata aki di Balaraman, Zwanenburg, Ortega, Asuaje i De Andrade ku a presentá kaba na inisio di aña den kompania di nan abogadonan unda tabatin diferente petishon pa skucha vários testigu den e kaso. Wes a bai di akuerdo pa skucha vários di e testigunan, inkluyendo algun ku ya a testiguá den e parti di Hulanda, esta Cymbal, entre nan algun akountent kende tabata tene buki pa algun di e sospechosonan. . Den e kaso aki tin abogadonan manera mr. Vaders, mr. Wilsoe, mr. Lodewijks, mr. van Gils, mr. Murray i mr. Kostrzewski ku lo mester sali na defensa di nan klientenan. Na yanüari ultimo, abogadonan a presentá ku lista di petishon pa skucha testigu , unda vários a keda halsá pa wes. E kaso lo bolbe bin dilanti 14 yüni próksimo, unda lo tin un regiezitting, miéntras wes a bisa ku lo trata e kaso aki despues.

Bron: Vigilante

Geef een reactie

Het e-mailadres wordt niet gepubliceerd. Vereiste velden zijn gemarkeerd met *