Lider di PAR Emiy de Jong – Elhage:
ORANJESTAD(AAN):E caida di Gabinete Gerrit Schotte ta algo cu a wordo spera masha dia. Specialmente despues cu dia 29 di juli ultimo sr. Cleopa, di e coalicion, a tuma retiro y no ta sostene e Gabinete ey mas.
For di e dia ey, sr. Gerrit Schotte mester a subi trapi di oficina di Gobernador y entrega retiro di su Gabinete.
Esaki ta loke e lider di PAR, e partido mas grandi, Emily de Jong-Elhage a duna di conoce.
Na mesun momento e ta bisa di ta compronde cu e ta un dolor pa un Gobierno cu no a bin pa sirbi pueblo, pero a corda riba nan mes y cu tres siman caba cu a pasa den e berguensa di mas grandi ora cu den Conseho di Minister di Reino, dilanti tur Prome Minister, a wordo bisa cu Gobierno di Corsou a haya un instrucccion.
Pa e lider di PAR ta increibel con dos aña pasa su Gobierno a traha riba un sistema pa saneamento di debenan, mientras cu e Gobierno actual a traha un presupuesto despues cu un surplus di 50 miyon y ya despues di un par di luna tabata tin un deficit di mas cu 150 miyon florin. “E pueblo aki merece algo miho,” Emile de Jong Elhage a bisa cu e Gobierno di Schotte a purba di tur sorto di forma pa keda, a bin cu tur sorto di triki hasta pa bisa cu Gobernador a bisa nan cu no tin pura.
Den tur esaki el a bin haya un sla diahuebs for di su mesun miembro di partido pa cual no a kede nada otro cu bishita Gobernador. E politico a sigui bisa cu PAR cu ta e partido di mas grandi di Corsou semper ta prepara pa bay den cualkier lucha.
Y ta prepara pa tur escenario, hasta pa bay eleccion. PAR hasta den oranan di mainta a sinta na mesa cu sr. Davelaar, Godett y Cleopa, y cu nan 8 asiento por a forma mayoria den Parlamento, y ta dispuesto pa sinta discuti pa un gobierno nobo. Gabinete Schotte, el a bisa, a keda schuif, pa evita di bay eleccion y keda sinta riba e stoelnan di Gobierno. Goberna cu fraccion chikito ta algo masha dificil, na opinion di lider di PAR.
Sinembargo mester pensa cu ora un persona drenta politica, a bin pa sirbi pueblo. El a señala a cuminsa torno cu servicio di seguridad, kitando e director pa evita cu e politiconan cu mester drenta Gobierno no ta pasa den e screening test.
E director a bay Corte varios biaha y a gana tur su casonan. Den cuadro di esaki e prome instruccion a yega ora cu e servicio di seguridad di Hulanda a bin tuma over e departamento aki. A mata tur e NV-nan di Gobierno, coriendo cu tur e directornan sin motibo valido.
Tur a gana nan casonan den Corte y mester paga nan miles y miles di florin, basta cu logra pone partidarionan den e puestonan ey y haci negoshinan na nan beneficio. Riba dje a gaña cu atletanan di Corsou por desfila den olimpiada cu bandera di e pais, a papia di un druk-tank cu lo a haya regalo di Venezuela, pero a resulta di ta un negoshi. Esaki ta e maneho cu e Gobierno di Schotte a bin ta hibando pa 21 luna largo.