Willemstad – Djasabra 25 di ougùstùs Digicel ta duna inisio na un proyekto di limpiesa ku e kompania di telekomunikashon a adoptá den bario di Buena Vista. Huntu ku alrededor di 50 habitante un tim di trahadó di Digicel ta drenta bario pa limpia algun lokalidat. E proyekto ta dura un siman i ta kuminsá i finalisá na Vèlt di Buena Vista.

E ‘Tim di limpiesa di Buena Vista’ ta bai pasa na Anegandaweg, Valentijn, Androsweg, Gora i Sto. Domingoweg. Durante di e siman di limpiesa ta bai pasa ku trùk i loder pa limpia e áreanan menshoná. Ku e akto aki komishon di bario no ke realisá solamente un bario limpi, pero tambe ke krea un ambiente sigur. E komishon ta konsiente ku ta habitantenan mes ta responsabel pa tene nan bario limpi.

Ku nan programa ‘Bario Ekstraordinario’ Digicel ke duna un aporte finansiero na desaroyo di barionan. Esaki ta motivashon pa adoptá algun proyekto ku den yüni a keda presentá durante di Marshe di Bario, un proyekto di Plan Nashonal pa desaroyá Bario. E proyekto di Buena Vista ta e promé proyekto ku Digicel ta adoptá for di e katálogo di Marshe di Bario. Digicel tin planeá di adoptá algun proyekto mas for di e katálogo aki, pero no ta divulgá ainda ta kua esakinan ta.

Durante di e Marshe di Bario, ku a tuma lugá den patio di Universidat di Kòrsou (UNA), representantenan di 13 bario a presentá proyektonan ku nan ke mira realisá den nan bario. Kada bario a presentá 3 proyekto.

Djasabra trabounan ta kuminsá for di 8or di mainta na Vèlt di Buena Vista na Sto. Domingoweg. E ‘kick-off’ di e siman ta tuma lugá 8or di mainta.

Buena Vista ta un di e 20 barionan ku e aña aki ta forma parti di Plan Nashonal pa desaroyá Bario. Otro barionan ku a presentá proyektonan na Marshe di Bario ta: Fortuna Ariba, Kanga, Montaña, Nieuw Nederland, Ser’i Otrobanda, Kortijn, Parerawijk, Seru Grandi, Soto, Souax, Tera Kòrá, Willibrordus i Wishi.