Willemstad – Gobièrnu di Kòrsou, representá pa Minister Presidente dr. Ben Whiteman, huntu ku Refineria di Kòrsou N.V. (RdK), representá pa su direktor señor José van den Wall Arnemann, djasabra anochi 19 di novèmber 2016 a firma un ‘Heads of Agreement’ ku e kompanianan Guangdong Zhenrong Energy Co. Ltd (GZE) i China Zhenrong Holding Limited (CZR), tur dos representá pa señor Chen Bingyan.
Ku GZE ya Gobièrnu di Kòrsou tin un Memorandum of Understanding (MoU) firmá. CZR ta e un kompania ku GZE lo lanta na Kòrsou pa ehekutá e trabounan ku ta surgi for di e kontratonan final ku den futuro e partidonan lo firma ku otro.
E meta di e ‘Heads of Agreement’ ta pa GZE invertí den modernisashon i upgrading di e refineria i Curaçao Refinery Utilities (CRU) di forma ku esakinan por kumpli ku e normanan medioambiental internashonal di mas haltu. Manera konosí, lo logra esaki dor di introdusí uso di gas natural komo kombustibel, kual ta redusí e impakto riba medio ambiente ku mas ku 80%. Tambe lo upgrade e terminal di petrolio na Bullenbaai. Tur e invershonnan aki lo hasi e refineria, CRU i e terminal mas moderno i duradero. E kontrato lo ta unu a largo plaso i GZE lo paga un tarifa kombiná, ku ta konsistí di un parti fiho i un otro parti variabel.
MoU
E MoU ku Gobièrnu di Kòrsou a firma riba 15 di sèptèmber ku e kompania Guangdong Zhenrong Energy Co. Ltd. tabatin un durashon di 2 luna, ku posibilidat di ekstenshon ku 2 luna mas. Den 2 luna partidonan a logra di yega na e ‘Heads of Agreement’, den kua ta deliniá e kuadro di tur e loke lo bai negoshá den e próksimo lunanan, pa yega na un kontrato di hür nobo, ku lo remplasá esun eksistente. A base di e kontrato definitivo ei, GZE lo tin e responsabilidat pa operá e refineria i e terminal di petrolio na Bullenbaai, i kumpli semper ku skemanan estrikto di mantenshon ku ta keda usá internashonalmente den e industria petrolero. E deadline pa GZE yega na un kontrato di hür definitivo ku RdK ta aki kasi un aña, esta 15 di novèmber 2017.
Sektor
Despues ku RdK yega na un kontrato di hür nobo, e intenshon ta pa otro kompanianan den e sektor industrial i bankero di Kòrsou tambe drenta den akuerdonan separá ku GZE. Ta trata aki di Curoil, Selikor, IUH (Aqualectra), CPA/KTK i PSB Bank. GZE lo invertí den upgrading di tur instalashon di RdK. Banda di esaki, Gobièrnu di Kòrsou mes tambe lo negoshá ku GZE pa yega na un Kontrato Gubernamental ku lo reflehá aspektonan komersial i akuerdonan fiskal.
Workforce
Un aspekto di importansia pa Gobièrnu tin di haber ku kreamentu di kupo di trabou pa habitantenan di Kòrsou. GZE lo invertí den desaroyo di habitantenan lokal, a base di un Workforce Development Plan ekstenso, ku lo perkurá pa mas tantu posibel hendenan lokal keda entrená i empleá pa hasi trabounan direkto i indirekto di upgrade na e refineria i e terminal di petrolio. E plan aki mester ta kla riba 30 di aprel 2017.
Gobièrnu ta interesá tambe den mantenshon di empleo eksistente. Na Refineria Isla mes ta garantisá un mínimo di 1.200 empleo, i ademas profeshonalnan lokal lo forma parti di gerensia. Lo introdusí un regla ku trahadónan di kontratista lo risibí pago i kondishonnan ku ta igual na esun di trahadónan di Refineria Isla. Komo operador nobo GZE ta komprometé su mes tambe pa negoshá CAO ku e sindikatonan i invertí den training i skol di fishi.
Deadline
Otro puntonan importante ku ta reflehá den e ‘Heads of Agreement’ tin entre otro di haber ku e forsa finansiero di GZE. Awor ku a firma e ‘Heads of Agreement’, GZE tin 28 dia pa entregá un ‘Letter of Intent’ di un banko di bon reputashon komo prueba ku GZE ta finansieramente viabel. Un otro fecha importante ta 30 di aprel 2017, ya ku esaki ta e deadline pa GZE entregá e promé konsepto di su plan tékniko di proyekto den kua tin reflehá e asina yamá Front End Engineering Design, o sea “FEED”.
Bron: Persbericht Regering Curacao