Opinie Eldon Sulvaran, Chester Peterson en Anthony Eustatius (KFO)

WILLEMSTAD.- Punto di salida, tambe di statüt,ta ku outonomia ta trese kuné ku kada pais ta atendé su mes asuntunan. E leinan di konsenso ta un infrakshon mayúskulo riba outonomia i igualdat.

Ta mas ku kla ku aworakí riba tereno di hustisia i finansa no tin igualdat den e supuesto reino aki. Paso lei di konsenso a obligá nos pa entregá poder i kontrol na otronan. Kòrsou Fuerte i Outónomo (KFO) ta bisa ku e entrega a kuminsá bou di Zita Jesus–Leitu komo diputado di struktura estatal e tempu ei. Esaki despues ku a gaña pueblo entre otro den boletin #02 di referendum 2005, ku Kòrsou lo haña su mes Prokurador General i un status komparabel ku esun di Aruba, esta ku su mes Banko Sentral.

Asina a traha e promé trampa, pa por akomodá deseo di Ulanda pa hañá mas kontrol riba nos asuntunan propio. Mal informando pueblo ku ta trata di koperashon boluntario, pa despues hinka den e leinan aki, ku Kòrsou no por sali fo’i nan sin aprobashon di tantu Sint Maarten komo Ulanda. Asina a malusá artíkulo 38 di statüt pa duna Ulanda influensia determinante riba kontenido di asuntu ku konstitushonalmente ta pertenesé na outonomia di nos pais. Na lugá di lei di konsenso nos a kai den leinan obligatorio ku nos no por sali fo’i dje riba nos propio boluntat. Asina a obligá pais Kòrsou manera e eksperto estatal, defuntu Carlos Dip, a bisa, p’e regresá bèk den era kolonial, te hasta promé ku e nase komo pais.

KFO ta sigui bisa ku e base di e leinan aki no ta sirbi nos pa nada i lo sigui trese solamente mas problema i divishon. Pasobra pa nos no ta trata di futilidat, pero di un kuestion ku karakter fundamental i di prinsipio. E eskoho pa lei di reino a enserá alabes un eskoho pa un órgano di Ulanda ku nos no tin niun kontrol riba dje. Ta nos derechi pa na kualke momentu nos legislador formal terminá e leinan aki, paso no por tin lei di konsenso sin konsenso. Pa esei mester di kurashi polítiko i mester realisá e konsekuensia i implikashon di e leinan aki pa nos futuro generashon, ku lo lanta den un pais sin un struktura demokrátiko. Nos sigur lo no bai ku esaki riba nos konsenshi. Esei ta e debe ku nos tin ku nos yunan. Nos mester siña nos yunan ku yu di Kòrsou mes por i ku e lugá di nos aki ta mas importante ku nos tur. Indiskutibel ta ku den un demokrasia un minister ta polítikamente responsabel pa e kartera ku ta kai bou di dje.  Tur ámtenar  ta hirarkikamente supordiná na e minister. Nos ta biba den un pais ku lei eksplísitamente ta prohibí nos minister pa duna un ámtenar ku ta kai bou di dje i ku tin tres hefe, entre kual un na Ulanda, instrukshon konkreto i direkto den niun asuntu spesífiko.

Kaminda nos minister ta e úniko responsabel den nos parlamento. Pa por akseptá responsabilidat polítiko i pa por ehersé su funshon adekuá, un minister mester por duna instrukshon konkreto na su ámtenar.  Pa humiá nos mas ainda, a stipulá den e lei di konsenso ku si nos minister kier duna e Prokurador General apuntá pa Ulanda un instrukshon konkreto, e mester bai serka un hues ku ta aki pa 3 aña so i ku no sa nada di nos sosiedat i ademas no tin apsolutamente nada di aber ku gobernashon, pa, manera un mucha chikitu, pidié pèrmit si e mag duna esun ku ta kai bou di dje un òrdu konkreto.

Pa kolmo a duna e figura di Prokurador General poder pa stipulá liña di maneho pa nos ministerio públiko, sin ku e mester konsultá ni haña aprobashon di nos gobièrnu òf parlamento. Nos por bai kuantu elekshon ku nos ke, e kosnan aki ta reglá den lei di konsenso ku nos no por mishi kuné.  Spiritu di sakrifisio na fabor di patria pa un kousa noble i hustu, ta e úniko opshon. Moveshon NO mester bira e moveshon mas importante pa e yu di Kòrsou den siglo 21 asina KFO ta terminá bisando.