27 C
Willemstad
• woensdag 27 maart 2024 21:23

Extra | Venezolano ku a tira arma afó ta insistí ku ta bòter el a zuai

Venezolano ku a tira arma afó ta insistí ku ta bòter el a zuai

WILLEMSTAD,- Korte no a kere nada lokual e akusado venezolano Endri Leindez Diaz (22) akusá di a tira den laira, a trese dilanti.

Diaz a keda akusá ku dia 24 di yüli último e tabata den posishon di un arma di kandela marka Baretta mas 7 bala skèrpi. Segun hues su relato, riba e dia ei polis a haña un notifikashon ku tabatin un bringamentu na establesimentu Tasca Don Quijote.

Despues testigunan por a tende tiru ku a keda di los den laira. E akusado a keda arestá despues di a konstatá ku el a benta un arma di kandela pafó. Diaz a konta hues ku e dia ei e tambe tabata den e lugá.

Dado momento a surgi un diskushon, di kual miembronan di e gerensia a saka e ku su amigu pafó. Segun e akusado, ora ku nan tabata pafó nan a tuma nota ku tabatin mandamentu di bòter. El a sigui konta ku despues e i su amigu a kana bai kue e vehíkulo pa nan hala kita.

Segun e prosèsverbal di polis, na momento ku nan a yega nan a tuma nota di un Suzuki Swift ku a bira bèk i hisa velosidat.

Mesora polis a sende sirena i kuminsá persiguí e vehíkulo.
Polis a bisa den prosèsverbal, ku dado momento nan a mira kon e shofùr a habri e porta i zuai algu afó. Despues di a logra para e vehíkulo polisnan a bin hasi un investigashon i a bin haña e opheto ku nan a mira e akusado benta afó.

Esaki a resultá di ta e arma ariba menshoná.
E akusado a bisa ku nunka e no tabatin niun arma.
El a splika ku e loke el a zuai afó tabata un bòter di serbes.
Hues de Kort a bisa Diaz ku e no ta mira e motibu ku netamente durante persekushon e ta haña gana di habri porta di e vehíkulo i tira un bòter bashí afó.

Segun e akusado e kier a evitá problema ku polis mirando ku e ta ilegal i tabata un tiki fuma. Fiskal a bisa ku e no ta kere nada di e istoria di e akusado paso e no ta lógiko.

Esaki a pone ku fiskal a yega na un demanda di 18 luna di kual 6 kondishonal ku ta e kastigu pa poseshon di arma.

Hues tampoko no a kere e istoria di e akusado. Segun hues de Kort e istoria no a konvensé. Hues a bai kompletamente di akuerdo ku e demanda di fiskal.

Bron: Extra

Geef een reactie

Vul alstublieft uw commentaar in!
Vul hier uw naam in

Lees ook

Meer recente reacties