WILLEMSTAD. – Abogado mr. Eldon “Peppie” Sulvaran tabata amplio ayera den su defensa di e tres kurasoleñonan Rietwijk, Felisia i Koeiman. Sulvaran a trese dilanti, kon e merikanonan a provoká e kurasoleñonan ku a nenga di partisipá den negoshi di droga, pero a keda riba nan te ora ku nan a kai den e trampa di e merikanonan.
E loke ku Sulvaran a pleita no ta un kos fásil, pero e abogado ta fuertemente bou di e impreshon ku e persistensia di parti e merikanonan ta kompletamente for di base. No por laga tres hende bai Merka riba investigashon falsu i provokashon. Manera ta konosí, outoridatnan merikano ta persistí pa e tres kurasoleñonan keda ekstraditá pa teritorio merikano.
Motibu di esaki ta ku nan lo a sòru pa un baha 10 i un otro biaha 60 kilo di kokaina yega Merka. Pero ta hopi kos a pasa entre tantu ku e kriminalnan ku a sera kabes ku outoridatnan di DEA. Ora ku e kurasoleñonan aki a keda aserká pa algun hende ku oferta pa transportá droga, kada un riba nan mes, separá a nenga. Sin sa ku ta un kòmplòt i trampa tin pa nan kai aden. Nan a sigui persistí te ora ku finalmente nan a bai di akuerdo ku e oferta i awe ta buska nan pa sera na Merka.
Ta trata di un trampa i provokashon di outoridatnan di DEA merikano i algu kriminal ku a koperá ku e outornan di DEA. Sulvaran ta totalmente kontra di e forma aki i a hiba un defensa kaminda ku e ta splika ku lei no ta trahá pa sirbi tipo di trampa aki. Sulvaran a mustra riba e diferente tratadonan europeo ku ta indiká ku e merikanonan a faya.
Bron: Extra