WILLEMSTAD.- ‘Hopi hende ta lubidá ku den e temporada ku DAE no tabata tei, ku a laga hende na Kòrsou aki desampará, InselAir a yuda e hendenan ei. Masha hopi hende a keda pegá aki.

Nos no a haña niun depchi di niun hende pa esaki. Nos a hasi esaki grátis.” Direktor di InselAir Edward Heerenveen ta splika ku na su opinion no ta hustu pa kritiká InselAir.

Djadumingu pasá gobièrnu a manda un komunikado di prensa ku e tópiko ku kompania di aviashon InselAir a aserká Gobièrnu pa sondia posibilidat pa solushoná e problema ku e kompania ta konfrontando ku ‘ cashflow’. InselAir ta indiká ku e situashon aki ta konsekuensia di e 100 mion dòler ku tin pegá na Venezuela. Gobièrnu a instituí un komishon di sabio bou di liderazgo di eks minister-presidente Etienne Ys pa por buska un solushon pa e problema aki.

Partido polítiko MFK a pidi pa un reunion urgente tokante e petishon di InselAir, MFK ke sa e argumentonan pa posibel dunamentu di fondo públiko na un kompania privá.

Edward Heerenveen: ‘Te ainda InselAir no a haña nada di gobièrnu. Korpodeko a duna finansa. Esaki ta bou di sierto kondishonnan. Ta finansa pa nos mester paga bèk.” Segun Heerenveen InselAir ta hopi importante pa desaroyo di Kòrsou. Te ainda nos tin un “volúmen i benta” di 350 mion florin, ku a pasa dor di banko Sentral di Kòrsou i St. Maarten i a paga tur sorto di kos na Kòrsou. Tambe hopi negoshi a haña plaka.”

Heerenveen no ta di akuerdo ku awor, na momentu ku InselAir ta pidi pa un yudansa, tin hopi kritiká riba e kompania. ‘Danki na InselAir ekonomia di Kòrsou a krese. Danki na InselAir, por ehèmpel, tabatin hopi turistanan for di Venezuela riba kaya di Kòrsou, sòru ku ekonomia di Kòrsou por a krese.”

Bron: Extra