WILLEMSTAD.- Parlamentario pa MAN Eugene Cleopa a manda karta pa Promé Minister Eugene Rhuggenaath kaminda e ta kuestioná supuesto iregularidat na Refineria Kòrsou NV i Multi Discipilnair Project Team.
Pa medio di e karta ei el a hasi Promé Minister algun pregunta na nòmber di komunidat pa asina haña klaridat enkuanto di Refineria di Kòrsou N.V. (RdK) i “Multi Disciplinair Project Team” (MDTP) relashoná ku e proyekto di renobashon di Refineria Isla. Komo parlamentario ku masha preokupashon Eugene Cleopa a tuma nota un biaha mas di deklarashonnan den media tokante supuesto iregularidatnan rondó di RdK i MDTP.
E echo ku a firma un “Heads of Agreement” (HOA) ku e kompania estatal di China, Guangdong Zhenron (GDZR) e informashon aki riba menshoná lo no ta na bienestar di e negosiashonnan ku tur e konsekuensianan ku esaki por trese kuné pa ku e proyekto di e magnitut aki. Un proyekto ku lo ta un katalisator pa nos ekonomia ku lo bai generá entradanan kuantioso pa gobièrnu pa asina e por mehorá nos situashon sosial i edukashonal di nos komunidat.
Komo parlamentario ta mas alerta ainda pa e echo ku RdK dia 13 di yüni último korte a duna veredikto enkuanto e mal maneho ku a hiba pa ku entre otro RdK. Cleopa a bisa di ta sumamente preokupá di e informashonnan ku nan a tuma nota di dje.
Mirando e forma kon diligente ku promé minister a bin ta atendé ku entre otro e Ministerio di Asuntunan General e ta konvensí ku Promé Minister lo bai atendé ku e supuesto iregularidatnan ku a wòrdu señalá i denunsiá, tantu na Ministerio Públiko komo den prensa. “Nos mester di klaridat i trankilidat pa e proyekto(nan) ku nos tin ku sigui desaroyá huntu ku GDZR pa asina esaki no tin ningun estorbo ku por peligrá e desaroyo aki”, Cleopa a bisa.
Teniendo na kuenta ku e situashon sumamente preokupante i alarmante aki riba menshoná i pa evitá innesesariamente ku e proyekto ku GDZR ta kore peliger, e ta urgi minister pa tene kuenta ku e siguiente preguntanan di miembronan di parlamento di Kòrsou.
Preguntanan ku komo parlamentarionan ke haña kontesta di minister riba nan ta lo siguiente:
Minister por informá parlamento ku minister ta na altura di e deklarashon tendensioso ku a sali den media tokante di RdK i tambe di MDTP? Si esaki ta e kaso kiko ta e informashon ku minister ta disponé di dje?
Si e deklarashonnan akiriba menshoná ta kuadra ku realidat kua ta e pasonan ku minister lo bai tuma pa evitá ku esaki por tin un impakto negativo riba e negosiashonnan ku GDZR?
Por haña un bista riba ki término di tempu minister lo bai atendé e supuesto iregularidatnan aki riba menshoná?
Teniendo kuenta di e preokupashon grandi ku tin den komunidat enkuanto RdK i tambe MDTP Cleopa a bisa di ta keda pendiente pa un kontesta rápido riba preguntanan.
Bron: Extra