WILLEMSTAD. – Pa aklará kisas un konfushon, abogado di Ministerio Públiko van den Heuvel a trese dilanti den e kaso kontra di Norbert George pa obligá un rektifikashon, e ke enfatisá ku e kaso aki no tin nada di aber ku kita un hende su libertat o sea no ta trata di un kaso penal, pues niun hende no ta bai será, ta trata aki di un kaso sivil ku ta henteramente un otro kos.

Van den Heuvel ta di opinion ku e loke ku Norbert George a hasi, esta ekspresá tokante ku tin periodista riba payroll ta un forma di difamashon i ta katalogá Ministerio Públiko komo no íntegro.

Van den Heuvel a bisa ku Ministerio Públiko ta blanko di krítika tur dia, pero mayoria di e krítikanan aki no ta bai profundo i hopi biaha por mira e krítikanan aki komo proyektil nan blanku sin motivashon.

Pero den kaso di akusá un instansia den un forma konkreto no ta aseptabel. Den e kaso aki Ministerio Públiko ta keda tildá di a hasi su mes kulpabel na soborno na tres periodista, kaminda dos ta keda menshoná ku nòmber kaminda ku nan lo a baha trapinan di edifisionan di Ministerio Públiko ku ènvelòp ku plaka aden.
Van den Heuvel ta di opinion ku esaki ta loke ku George tin di proba. E no tabata ke a rektifiká i den e kaso aki Ministerio Públiko tin di defendé su mes kontra di un engaño.

No por laga e asuntu aki drumi, sigur no un instansia manera Ministerio Públiko ku tin den su man pa mantené órden públiko i mester ta íntegro.

Van den Heuvel a bisa ku el a tende George na radio ayera mainta i el a bisa ku e tin di bai un kaso kaminda ku tin un hues ulandes i e mester bringa kontra di un Prokurador General ulandes. Si e pèrdè e kaso aki, ta pa motibu di esei. E ulandesnan aki no konosé kultura di Kòrsou.

Van den Heuvel a trese dilanti ku si George pèrdè e kaso, no ta pa e motibu ei, ta pasobra e no por pruebá e loke ku e ta bisa. George simplemente a bai muchu leu den su ekspreshonnan i ta obligá rektifikashon.

Bron: Extra