WILLEMSTAD.- Minister-presidente Eugene Rhuggenaath a deliberá resientemente ku minister-presidente di Ulanda Mark Rutte. ‘Nos a deliberá sin agènda di tópikonan. E tabata un kombersashon di introdukshon na un manera kolegial.

Mensahe prinsipal tabata ku kolaborashon den Reino ta importante pa nos dos. Nos a deliberá kiko ta áreanan pa nos por traha huntu. Spesífikamente nos a papia tokante retraso soshal ku tin den diferente bario na Kòrsou. Pero tambe nos a deliberá tokante desaroyo ekonómiko i fortifikashon di gobernashon. Esaki nos a deliberá ku sekretario-general di ministerio di relashon di reino Richard van Zwol durante su bishita na Kòrsou na Yüni kaba. Ku Rutte nos a sigui riba e kombersashonnan.”

Segun Rhuggenaath minister-presidente di Ulanda Mark Rutte tin intenshon pa bishita e diferente islanan i pais di reino, i sigur Kòrsou, riba un tèmpo relativamente kòrtiku. ‘E lo kombiná su bishita ku un mishon di komersio, un ‘handelsmissie’, pa trese kompanianan di Ulanda na Kòrsou. Pa asina promové Kòrsou komo destinashon di invershon.’

Rhuggenaath i Rutte ke sigui ku kombersashon di trabou, pero na promé instansia tin ku warda proseso di formashon pa un gobièrnu nobo na Hulanda.

Rhuggenaath tambe a bishitá Rei Willem-Alexnader. A delibera tokante Reino, gobernador di Kòrsou, e importansia di fortalesé lasonan den Reino i tambe tokante importansia di stabilidat. Ku su preguntanan, Rhuggenaath ta splika, Rei a mustra su kompromiso ku Kòrsou i e desaroyo di e pais. Segun Rhuggenaath Rei konosé Kòrsou hopi bon i tin un interes sinsero’.

Bron: Extra