WILLEMSTAD, – Korant ulandes De Telegraaf den su edishon di awe ta skibi ku Venezuela a yuda partido Pueblo Soberano kuater aña pasá pa bira e partido mas grandi di Kòrsou.
Segun e korant tin diferente hende ku a deklará ku gobièrnu di Hugo Chàvez a kontribuí na kampaña di Helmin Wiels den aña 2012.
Pero den e artíkulo no tin prueba. Un persona ku ta keda anónimo ta splika ku Wiels a bishitá konsulado Venezolano na Scharloo diferente bia. Tambe el a bisa ku Pueblo Soberano a haña hopi material di elekshon, manera bandera for di e konsulado.
Telegraaf ta skirbi ku dia 19 di òktober 2012, dia di elekshon, dos polítiko Venezolano tabata presente na sede di Pueblo Soberano na Palu Blanku: Rodrigo Cabezas i Calixto Ortega, nan dos tabata afiliá ku presidente Hugo Chavez. Ortega awendia ta wes, nombrá dor di presidente Nicolas Maduro.
Den e artíkulo ta menshoná ku Hugo Chàvez tabata un inspirashon grandi pa Helmin Wiels. Tambe den e artíkulo tin yen spekulashon tokante kontakto entre partido di Chàvez i Pueblo Soberano.
Segun e korant te ainda tin bon kontakto entre konsulado Venezolano i Pueblo Soberano pero tambe ku partidonan manera MFK, Movementu PAS i Kòrsou di Nos Tur. Motibu di Venezuela pa yuda partido polítikonan na Kòrsou ta e refineria, segun De Telegraaf. ‘Venezuela ke keda hasi uzo di e refineria, despues di aña 2019, ora kontrato entre PdVSA i Kòrsou ta vense. Tambe Chàvez a sostené aspirashon di independensia di Pueblo Soberano’, segun korant De Telegraaf.
Bron: Extra