WILLEMSTAD.- Minister-presidente Ben Whiteman ayera den su diskurso nashonal a splika ku firmamentu di ‘ Memorandum of Understanding’ ( MOU) ku e kompania chines Guandong Zenrong Energy Company, ku a tuma lugá dia 15 di sèptèmber, tabata e mihó opshon pa Kòrsou.

Segun Whiteman gobièrnu a traha duru pa buska un solushon pa kon nos ta sigui ku refineria despues di 2019 ora kontrakt ku PdVSA tokante refineria ta stòp.

Whiteman ayera a splika ku tin invershonistanan kla para pa bini Kòrsou pa yega na palabrashonnan. Whiteman resientemente a bai Venezuela pa firma un MOU ku gobièrnu Venezolano pero sin resultado. Pa e motibunan aki a opta pa no sigui warda mas, sino di buska alternativanan.

Minister-presidente Whiteman ayera a splika ku e alternativa mas kumbiniente ku gobièrnu a risibí ta e oferta di e kompania estatal chines Guandong Zenrong Energy Company Ltd.

‘ E kompania aki a mustra disponibilidat di yega na un kooperashon ku gobièrnu di Kòrsou pa finansiá, modernisá i operá henter e kadena energétiko di Kòrsou.

E kadena aki ta inkluí Refineria, BOO/ CRU i Bullenbaai. Ademas nan ta dispuesto pa yuda den modernisashon di nos planta di awa i elektrisidat i tambe konstruí un terminal nobo di gas na Bullenbaai.

Mirando ku tur esfuerso pa yega na un akuerdo ku Venezuela no a resultá ta na e momentunan aki, a disidí di no warda mas i a sinta na mesa ku Guandong Zenrong Energy Company Ltd. i e resultado di esei a duna fruta.”

Segun Whiteman e akuerdo ku a keda firmá ku e kompania Chines ta e promé paso ku ta representá e posibilidat di un invershon total di 10.000 mion dòler merikano.

‘ E seriedat ku e kompania chines aki a mira den gobièrnu a pone ku nan no a pidi ningun garantia di parti di gobièrnu.”

Minister-presidente Whiteman ta enfatisá ku 10.000 mion dòler ta 18.000 mion florin.

Ku ta mas o ménos 8 biaha presupuesto anual di pais Kòrsou, 3 biahe loke Kòrsou ta produsí pa aña, i 40 biahe e invershon den hospital nobo.

Bron: Extra