WILLEMSTAD.- Den kuadro di un investigashon penal ku ta andando relashoná ku violashon di Lei di Opio i tambe kaso di soborno ayera djaluna 25 sèptèmber 2017, alrededor di 6 or di mainta, personal di Divishon kontra di Krímen Organisá den koperashon ku KMAR a kontrolá un trahadó di imigrashon esta un polis, e hòmber sospechoso H.R.E.C., 57 aña di edat, nasé na Kòrsou.

Durante kòntròl den vehíkulo di e sospechoso H.C. polis a haña i konfiská algun paki di droga. Polis a detené e sospechoso aki.

Un ratu despues a sigui un entrada hudisial relashoná ku Lei di Opio den un kas situá den Curaçaostraat.

Na e kas aki polis di e Divishon kontra di Krímen Organisá a konfiská algun paki di droga i tambe un telefòn selular. En konekshon ku esaki a detené e hòmber sospechoso K.P.H., 58 aña di edat nasé na Kòrsou. Kontinuando ku e investigashon den e kaso aki polis a tene un entrada hudisial na e kas di e sospechoso H.C.

Na e kas aki nan a haña i konfiská un telefòn selular. Mas despues a sigui un entrada hudisial na un Residensia den e área di Kas Grandi.

Na e kas aki polis a haña i konfiská un I-pad, telefòn selular, un arma (air soft). Relashoná ku e kaso di soborno a detené un hende muhé M.F.V.L., 48 aña di edat, nasé na Portugal. Durante di investigashon na e adrès menshoná a haña i detené un hende muhé M.Y.G.G., 26 aña di edat nasé na Venezuela.
E persona aki ta permanesé riba nos isla sin ku su dokumentonan nesesario ta na òrdu.

Kontinuando ku e investigashon den e kaso aki, a tene un entrada hudisial na e ofisina di e sospechoso M.F.V.L. situá den e área di Piscadera. Na e ofisina aki a konfiská un kantidat di dokumento ku ta di importansia pa e investigashon.

A presentá e sospechosonan dilanti un fiskal ouksiliar ku a ordená nan enkarselamentu pendiente di mas investigashon.

Bron: Extra