Durante e aña Parlamentario aki a tene vários reunionnan. Tabatin total 30 Reunion Públiko i 21 reunion di Komishon Sentral. A atendé no ménos ku 23 proyekto di Lei.

Tambe parlamento a trata 40 moshon di kual 31 a keda aseptá.

Den komishonnan fiho tambe hopi trabou a keda realisá. E komishonnan fiho a reuní en total 47 biaha, ta loke ku presidente di parlamento sr. William “Junior” Millerson, a splika ayera na klousura di aña parlamentario.

E maneho, sigur for di mei 2017, ta pa laga e komishonnan fiho hasi e trabounan preparatorio promé ku reuní den Komishon Sentral òf Reunion Públiko. P’e motibu ei mes e komishonnan fiho a reuní ku vários grupo di interes di e komunidat di Kòrsou.

E maneho aki lo sigui mirando e efektividat di esaki i e forma ku fásilmente gruponan di interes ta haña kaminda pa Parlamento, segun sr. Millerson.

Durante e aña Parlamentario aki a tene pa promé biaha un Kombersatorio den sala di Biblioteka Nashonal di Kòrsou. Uso di e sala ei ta resultado di un MOU ku Parlamento a firmá ku Biblioteka anteriormente. Den e Kombersatorio miembronan di delegashon di Kòrsou ku a partisipá na e Asamblea General di Parlatino por a duna kuenta i rason di nan biahe. Tambe e komishon fiho di Asuntunan di Reino a duna relato di nan reunionnan den kuadro di IPKO.

Den e mesun sala di Biblioteka Nashonal di Kòrsou, Parlamento a risibí e delegashon Nashonal di Futbòl ku a bira Kampeon di Karibe.

Pa e aña Parlamentario benidero tin diferente proyekto ku mester haña atenshon. Un di nan ku ta hopi importante ta e kambionan den e Reglamento di Oden di Parlamento. E Reglamento di Orden aktual a drenta na vigor na 2010. Atraves di añanan a siñalá diferente aspekto den e forma di funshoná di Parlamento ku meresé atenshon. E kambionan di e Reglamento lo mester pèrkurá pa oumentá e efisiensia, i trese mas klaridat den funshonamentu di e instituto aki, sr. Millerson a terminá bisando.

Bron: Extra