WILLEMSTAD – Inspektor di Medio Ambiente i Naturalesa, ku sosten di e kompania Merikano Fluor, na desèmber 2016 a ouditá Aqualectra, Curaçao Refinery Utilities i Refineria Isla riba aspektonan tékniko I ambiental.

E inspekshonnan di e kompanianan aki den e área industrial di Schottegat tabata dirigí riba evaluashon di e instalashonnan, prosesonan operashonal i kondishonnan i maneho den relashon ku emishon di kontaminantenan ambiental i òf supstanshanan dañino. E inspekshonnan por sierto tabata los for di e diskushonnan relashoná ku futuro di refineria. Basá riba e ouditoria menshoná Fluor a duna tambe rekomendashonnan pa medidanan pa mehorá e situashon riba tèrmino kòrtiku i mediano, tur esaki kompañá ku kalkulashon di kostonan.

Na komienso di febrüari a presentá e rapòrtnan di ouditoria di Fluor na e kompanianan ku a keda inspektá pa kontrolá hechos ku a keda formulá. E inspektor riba petishon di e kompanianan a duna mas tempu pa evaluá resultadonan pa duna esakinan tur espasio pa fórmula nan punto di bista. Na inisio di aprel e kompanianan a risibí nan rapòrt di inspekshon huntu ku e rapòrt di ouditoria serka Fluor. E rapòrtnan a keda mandá tambe pa Minister di Salubridat, Medio Ambiente i Naturalesa komo outoridat konforme Hinderverordening Curaçao 1994.

Minister a hasi e rapòrtnan di inspekshon públiko i ta keda emití anexo na e komunikado aki.

E rapòrtnan di ouditoria di Fluor ainda no ta públiko pa motibu ku nan por kontené informashon komersial konfidensial di e kompanianan. Resientemente Ministerio a pidi e kompanianan ku a keda inspektá pa indiká kua ta e partinan den e rapòrt ku nan ta konsiderá komo informashon konfidensial. Esaki di manera ku Ministerio por kalkulá ku e rapòrtnan por keda publiká sea kompleto òf ku omishon di informashon konfidensial di e kompanianan.

E Inspektor di Medio Ambiente i Naturalesa lo keda hasi inspekshon pa keda vigilá ku e kompanianan ta kumpli ku e akshonnan korektivo ku a keda preskribí i kumplimentu ku Hinderverordening.

Bron: Extra