WILLEMSTAD.- Ta hasi nèt un aña ku Domeinbeheer a inisiá e proyekto “Tereno pa Tur, pero na òrdu sí”. Domeinbeheer por wak bèk riba un aña kargá ku akshon kontra di okupashon ilegal.

Prinsipalmente mas komunikashon ku pueblo di Kòrsou tokante maneho di Gobièrnu pa ku okupashon ilegal di tereno i e posibilidatnan ku tin pa formalisashon.

Na tur, Domeinbeheer a organisá 8 seshon di bario rònt Kòrsou den kuadro di e proyekto Tereno pa Tur ku e meta pa informá tokante okupashon ilegal di tereno di Gobièrnu i e posibilidat ku maneho ta brinda pa formalisá e uso di tereno. A splika na tur persona ku a bishitá e seshonnan aki ku mester evaluá kada kaso individualmente, ya ku niun kaso no ta meskos. Den kuadro di esaki mester tene kuenta ku por ehèmpel e echo ku Gobièrnu no ta formalisá okupashon ilegal di tereno di Gobiernu ku a tuma lugá despues di 1 di òktober 2015.

Domeinbeheer a konstatá diferente petishon pa formalisashon di terenonan ku ta pará bashí sin ningun konstrukshon ariba. Ta bon pa pueblo di Kòrsou ta na altura ku Domeinbeheer por mira den sistema di satélite presis kiko tin riba e tereno i den kua temporada tabatin sierto kambionan, sea di limpiesa di e tereno òf ku a pone kònteiner òf kualke otro opheto ariba. Domeinbeheer su maneho no ta permití pa formalisá tereno ku ta okupá di forma ilegal sin konstrukshon ariba. Tampoko no ta hasi distinshon den formalisashon di terenonan bashí promé òf despues di 1 di òktober 2015. Den ningun di e kasonan menshoná aki formalisashon ta posibel.

Domeinbeheer kier pone énfasis riba e echo ku okupashon di tereno di Gobièrnu sin pèrmit no ta algu legal, pero teniendo kuenta ku e aspektonan sosial humano Gobièrnu ta formalisá te kaminda lei i maneho ta permití. Pa e motibu aki mes Domeinbeheer ta splika tur petishonario eksplísitamente ku no ta den tur kaso formalisashon ta posibel.

Bron: Extra