WILLEMSTAD.- Tin ehekutivonan haltu di PDVSA, ku lo ta dispuesto pa bini Kòrsou pa kòmbersá ku partidonan na Isla, pa asina trese trankilidat den e kompania.
Di otro banda, ainda e grupo ku a bai Venezuela pa reuní riba e tópiko aki, no tin fin di haña un kòmbersashon ku Promé Minister dr. Ben Whiteman pa inform’é di un ke otro. Esei EXTRA por a komprondé di un fuente hopi yegá na e kòmbersashonnan.
EXTRA a komprondé ku e grupo a konsistí di representantenan di e sindikatonan APRI, PWFC i sr. Errol Cova komo konsehero. Nan a hiba kòmbersashon ku ehekutivonan haltu, manera entre otro dr. Asdrubal Chavez, èks direktor di PDVSA i awor parlamentario.
Mas aleu, a reuní ku e direktor nobo di e kompania, dr. Longo.
Segun nos informantenan, kisas e enkuentro di mas importante den e bishita aki, tabata ku Minister di Petroli i Mina, dr. Eulogio del Pino. Den e kòmbersashon ei a profundisá riba e tema di Refineria Isla, e inkietut ku ta reina bou di trahadónan, pero tambe e kompromiso ku PDVSA tin i e interes grandi pa ku e proyekto di planta di gas ku nan lo ke mira mas pronto ku ta posibel. Ta parse ku Venezuela lo ta dispuesto asta pa instalá un pipa di gas entre e dos paisnan.
Pero hopi di e asuntunan aki ta dependé di desishonnan polítiko i ta p’esei ta importante pa e dos gobièrnunan tin mas kontakto ku otro.
Resientemente Premier Whiteman a papia ku koleganan na Venezuela, pero no a duna klaridat kiko eksaktamente a pasa.
Segun nos fuentenan, ta reina un ambiente di sekresia den gobièrnu riba henter e tópiko di futuro di Isla.
Pero e minister Venezolano a duna di konosé, ku e ta dispuesto pa bishitá Kòrsou pa trese trankilidat fondo di e asuntu aki.
EXTRA a komprondé ku un karta ku invitashon pa Premier Whiteman, lo mester a sali algun dia pasá ku petishon pa un reunion. Tin un inseguridat grandi ta reina bou di trahadónan, ya ku nan ta tende di komentarionan ku tin rondó di Isla.
Kisas ta e minister Venezolano lo mester bin aki pa trese kalmu, ya ku ta remarkabel ku tin un ambiente di sekresia den e tim multidisiplinario, ora ku ta trata di Refineria Isla.
Bron: Extra