WILLEMSTAD.- Habitantenan ku ta biba den bisindario di Hospital Atvènt lokalidat Taams, ta kansá. Tin un veredikto pendiente, pero miéntras tantu ilegalidat ta sigui tuma lugá, asina un di e habitante nan a duna di konosé.

E loke ku mas ta asombrá e abitantenan ta e echo ku MEO tin akshon kontra di tur ilegalidat, pero tòg no ta hasi nada ku Klínika Atvènt.

E problemanan i molèster di Klínika Atvènt, ántes Taams, ta múltiple. Pero tin un veredikto pendiente ku korte mester duna. Miéntras e veredikto ta pendiente, ilegalidat ta kontinuá, asina un di e abitantenan a duna di konosé na EXTRA. Ta trata di un disputa ku pa añanan ta andando kaba entre di habitantenan i klínika Taams i ku awor a bira Hospital Atvènt.

E habitantenan no por komprondé kon e hospital por ta habrí miéntras e no tin ni un permit pa tin un hospital na e sitio en kuestion. Habitantenan a alertá Klínika Atvènt, pa no kumpra e lokalidat Taams, pa motibu ku Taams tampoko tabatin pèrmit pa habri un hospital einan. E abitantenan a kana tur, pero tur departamento ku tin di aber ku pèrmitnan nesesario pa un hospital por ta operashonal na e sitio en kuestion i tur e departamento a bisa ku Hospital Atvènt no tin pèrmit i ku nan lo no haña pèrmit tampoko, pa e echo ku den e área en kuestion no por duna pèrmit pa un hospital.

Nunka tabata asina i awor esei tampoko lo kambia. E kos a bai robes for di tempu ku dr. Taams a traha su klínika i for di e tempu ei e abitantenan tabata buska nan derecho, pero tur akshon a resultá enbano. Pa kolmo Klínika Atvènt ta kambia nan entrada prinsipal, esta e entrada mester ta den Warawaraweg i awor a hasié na Kinikiniweg. Habitantenan a aserká MEO ku a bin wak e situashon, pero nada no a sali afó i tur kos ta sigui normal.

E pregunta di e habitantenan ta, dikon ta tuma medida kontra di tur otro empresa i e Klínika Atvènt no ta tuma medida kuné. EXTRA a aserká MEO i nan a duna di konosé ku en bèrdat nan sa di e situashon, pero no ta den nan man pa tuma niun medida pa ku e lokalidat di e klínika aki.

Bron: Extra