Extra | Kurasoleño Palm ku mas kaso likidashon riba su nòmber

Kurasoleño Palm ku mas kaso likidashon riba su nòmber

HUIZEN.- E hòmber nasé na Kòrsou Gerel Palm di 34 aña awor tin un kaso di likidashon mas riba su nòmber. Aktualmente Gerel ta fugitivo di lei, despues ku dia 12 di mart último el a hui for di prisòn Flora na Sürnam.

Outoridatnan na Ulanda ta konsiderá Palm komo tòp kriminal. Siman ku ta tras di lomba, el a keda poné riba e lista nashonal di esnan mas buská dor di Ulanda. E ta bira e di dos kurasoleño ku outoridatnan ulandes ta buskando i ta ser indiká komo persona peligroso.

Gerel ta ser buská pa polis di Rotterdam intento di likidashon di dos hòmber antiano den sirkuito di droga na Rotterdam. Desèmber di 2016 na Noordeloos, el a tira e dos hòmbernan. Ambos persona a sobrebibí e intento di likidashon, pero nan a keda gravemente heridá.

Awor ta resultá ku Gerel ta e sospechoso prinsipal den likidashon di e trahadó di un “Spy-shop” Ronald Bakker na Huizen den sèptèmber 2015. Bakker a keda likidá djis banda di su kas, den bista di su yu muhé chikí. Despues di e likidashon, esun ku a lòs e disparonan a hui bai riba un bròmer. E bròmer aki a aparesé riba imágen di tráfiko ku a keda grabá. E investigashon ku a hasi dje bròmer i e persona ariba a hiba outoridatnan na Gerel Palm.

Gerel ta keda detené den aprel di 2016 p’e kaso likidashon di Bakker, pero pa falta i sufisiente prueba el a keda poné den libertat den yüli. Gerel semper a desmentí e echo aki, pero ta keda sospechoso.

Manera indiká for di 12 di mart Gerel ta fugitivo. Despues di 12 dia ku e tabata arestá na Sürnam, el a logra hui for di e prisòn ku ta konosí di ta unu no den bon estado i tambe di práktikanan di korupshon. El a logra hui djis despues ku su abogado a realisá un bishita serka dje den prisòn. Gerel a haña un arma di kandela, i ku esaki el a tene e bewaker rehen i a hui den un vehíkulo ku tabata ward’e dilanti porta dje prisòn. Esaki a kondusí na un frustrashon grandi serka polisnan di Ulanda, pasobra Gerel tabata na punto di keda ekstraditá pa Ulanda. For di e dia ei, Gerel ta manera kos a pèrdè kompletamente for di radar.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *