WILLEMSTAD.- Dia 27 i 28 di desèmber 7 persona a firma i aseptá e elekshon komo miembro di Parlamento di Kòrsou.
Asina presidente di Konseho Supremo Elektoral Raymond “Pacheco” Römer a splika. Nan a entregá nan kredensialnan i tambe a firma e deklarashonnan segun lei na Parlamento di Kòrsou. E 7 personanan ta: Gassan Dannawi i Yaël Plet pa MAN. Henny Reinilia pa PNP, Curtley Obispo i Stephen Walroud pa PAR i Sherwin Leonora i Melvin “Mac” Cijntje pa Pueblo Soberano.
Römer: ‘Awor ta desishon pa presidente di Parlamento ki dia e ke huramentá nan komo parlamentario.” Manera ta konosí den un próksimo reunion di Parlamento huramentashon di parlamentarionan nobo por keda tratá komo parti di ‘ingekomen stukken’.
Un komishon di tres parlamentario mester kontrolá e kredensialnan di e personanan nobo i tambe nan mester keda huramentá dor di gobernador. Dia 6 di yanüari ta e próksimo reunion públiko di Parlamento di Kòrsou.
Bron: Extra