WILLEMSTAD. – Konseho di Minister djasabra último a bai di akuerdo pa un promé pago na fundashon finansiamentu estudio SSC p’asina garantisá estudio pa tur studiante. Asina minister di Enseñansa Marilyn Alcalá-Wallé a konfirmá.

A base di informashon ku e Hunta di Komisario a optené a reuní ku e minister djabièrnè siman pasá. Pa djabièrnè atardi e minister a reuní ku funshonarionan di Ministerio di Finansa i e titular di Finansa.

Den e reunion aki e desishon a kai ku ta traha riba e espasio nesesario pa por duna SSC un èkstra inyekshon finansiero.

Alcalá-Wallé no ke a divulgá kuantu sèn e nesesidat finansiero di SSC ta eksaktamente.

Pero sí el a splika ku ta for di otro ministerionan mester a saka e sèn paso e Ministerio di Enseñansa no tabatin sèn mas riba su presupuesto pa esaki. Konsekuentemente durante un reunion ekstraordinario di Konseho di Minister djasabra, desishon a kai pa pone un promé “tranche” di pago disponibel pa SSC.

Alcalá-Wallé a splika mas aleu ku segun e Hunta di Komisario i Büro di Akountent di gobièrnu SOAB ta sigui kompilá informashon i hasi nan investigashon i asina haña un mihó bista di e situashon ku SSC realmente ta aden i Konseho di Minister lo disidí kua ta e siguiente paso òf pasonan ku mester tuma.

Relashoná ku deklarashon anterior di e minister ku a deskubrí kosnan na SSC ku posiblemente ta enserá ku ta entrega keho na Ministerio Públiko i ku a deskubrí kuentanan bankario ku ta solamente e direktor di SSC tabatin akseso na dje, Alcalá-Wallé a duna di konosé ayera ku miéntras e investigashon di SOAB no ta kla e no por bai den mas detaye.

Palabrashon den koalishon ta ku ta informá Konseho di Minister promé ku komuniká mas aleu. Asina Alcalá-Wallé a duna di konosé.

Bron: Extra