WILLEMSTAD.- Segun un komunikado di abogado sra. Valerie Maria riba e página di VPM Law, Banco di Maracaibo N.V. a keda deklará bankarota den veredikto di korte 15 ougùstùs 1994.

E ta bisa ku e bankarota a keda pronunsiá den 1994. Komo curatornan tabata nombrá Eric Garcia, dos luna despues Robert Blaauw.

Pa órden di hues, abogado Valerie Maria a keda añadí komo curator. Dia 12 yüli 2016 señor Garcia a manda pa hues komisario via mail un dokumento bankario di MCB, den kua ta indiká ku e totalidat di e mas di 11 mion dòler di e ‘faillissement’ a keda depositá riba kuenta di e banko. Mediante e desishon mesun dia, hues komisario a honra posteriormente e petishon di abogado Blaauw pa e retirá komo curator.

E curator nobo a deskubrí despues di a konsultá ku MCB, ku e suma menshoná riba e dokumento bankario di $ 11,054,804.52 no ta konosí na MCB i ku en realidat tin solamente algun mil dòler den e kuenta bankario di e ‘faillissement’.

Mas investigashon a kondusí na e fuerte sospecho ku e dokumento di e kuenta mandá pa sr. Garcia na hues komisario ta trata di un falsifikashon. Dia 18 yüli abogado Maria den su kalidat di curator den kiebro di Banco Maracaibo a hasi un denunsia penal kontra sr. Garcia pa sospecho di malversashon i falsifikashon.

E denunsia ta referí tambe na un dokumento bankario ku probablemente Garcia a manda pa hues komisario na aprel 2016, i e informe públiko di e kiebro di promé òktober 2015. Den e informe aki ta bisa ku e suma ku ta pertenesé na ‘faillissement’ ta disponibel pa distribushon pa kreditornan di Banco Maracaibo, ku ta konsistí di un depósito di término na MCB di 11,026,930.89. E depósito aki no a tuma lugá.

E ta sigui bisa ku Ministerio Públiko a informá abogado Maria ku a detené sr. Garcia i ku lo bai interog’é. Abogado Maria ta investigando e pasonan ku por tuma pa minimalisá e dañonan di kasi 1500 di kuentanan di Banco Maracaibo i su otro kreditornan. Mester bai buska e suma pèrdí i informá e kreditornan.

Bron: Extra