WILLEMSTAD.- ‘UTS ta kuadra kompletamente ku tur lei i regla konserní. Esaki semper por keda konfirmá dor di tur kontròlnan obligatorio i tur otro sorto di kontròl finansiero.’

Asina direktor di UTS Paul di Geus a skirbí den un karta mandá na Parlamentu di Hulanda, ku ta Tweede Kamer. Ku esaki De Geus ke ninga akusashon ku a hasi resientemente dor parlamentarionan Ronald van Raak i André Bosman.

Segun De Geus e manera ku parlamentarionan Van Raak i Bosman a fórmula un sèt di pregunta, por krea un imáhen ku no ta kuadra ku UTS. ‘Imáhen inkorekto por tin su konsekuensha negativo riba relashon ku UTS tin ku su mes trahadó, kliente, partner, suministradornan, aktornan i públiko. De Geus ke evitá un konsekuensha asina.

Den su karta, De Geus ta splika ku no ta usual ku un kompania di Kòrsou ta manda un karta na Parlamentu hulandes. Pero segun De Geus esaki ta nesesario pasobra miembronan di parlamentu hulandes a pone atenshon negativo riba UTS, den un seri di pregunta pa ministernan Ronald Plasterk (Relashon den Reino) i Ard van der Steur (Hustisia).

De Geus ta enfatisá ku e ta apresiá ku parlamentu hulandes ta komprometé ku situashon di paisnan Karibense den reino. Tambe De Geus ta komprendé si Parlamentu hulandes ke haña mas informashon i tambe e ta skirbi ku e ta habrí pa preguntanan kritiko tokante UTS. Tambe De Geus ta ekspresá su konfiansa ku Plasterk i Van der Steur por respondé riba e preguntanan na un manera korekto.

Bron: Extra

Dossier Gokken