…E bala ta den man di direktiva…
WILLEMSTAD.- Minister pa Partido Nashonal Earl Balborda despues di reunion ku direktiva i komishon di disiplina di PNP a disidí ku awe, djabièrnè anochi e ta pone su posishon komo minister na disposishon di direktiva di partido. Pues e bala ta den skochi di e direktiva. E minister saliente ta splika ku ta basta luna e tabata hunga ku e idea a tuma retiro, pero e tabata warda e momentu oportuno pa no hasi daño na partido.
E minister a konta EXTRA ku el a reuní ku e órganonan ariba menshoná i a trese su puntonan dilanti. Tambe el a splika ku pa algun luna kaba e ta kontemplando su retiro komo minister. ‘E situashon entre señor Davelaar i mi persona ta hopi difísil pa resolvé. Pa esei, awe nochi, durante di e reunion general di miembresia, lo mi pone mi posishon na disposishon di PNP. PNP lo mester disidí ki dia minister Balborda ta baha”, asina Balborda a indiká. E ta mustra ku e ta un profeshonal ku a bini den gobernashon pa sirbi su pais. El a tuma ‘buitenbezwaar’ na Refineria Isla i bin traha pa Kòrsou i a traha semper konforme reglanan di bon gobernashon i a pone interes i bienestar di pueblo en general na promé lugá. E ta bai satisfecho i gradesido pa e gran oportunidat aki. E minister saliente ta bisa ku ta un sekreto públiko, ku pa algun tempu kaba e relashon di trabou entre lider polítiko di PNP Davelaar i su persona no ta optimal. Segun Balborda, nan tin diferensha den e manera di mira kos i estorbo den komunikashon. Esaki riba su mes no ta un problema ya ku ta kos ku por pasa den un proseso di maneho kompliká i delikado ku ta tuma lugá bou di hopi preshon. Un bon ehèmpel di esaki tabata e diskushon rondó di ruta di karnaval, kual a pone kuminsá pensa pa tuma retiro. Su úniko konsiderashon tabata e manera i momento korekto konsiderando e konfiansa ku PNP a depositá den dje i e sosten ku pueblo a dun’é. E tabata kier a bai na un manera elegante ku no ta hasi daño, paso e sa bon-bon kon delikado e posishon elektoral di PNP ta.
Den un kombersashon djamars mainta dia 24 di febrüari, den kantor di Davelaar e mes a ofresé Davelaar pa e tuma retiro komo minister. Davelaar na e momento ei a bisami ku esei no ta e solushon. Balborda ta sigui bisa ku djamars mainta 3 di mart vice presidente di PNP, Kenneth Martis, a inform’é ku Davelaar a notifiká direktiva di PNP ku e lo no kier traha mas ku e minister. Esaki tabata un sorpresa pa Balborda, mirando ku ménos ku un siman promé e mes a ofresé Davelaar pa mi tuma retiro komo minister, i ku na e momento ei Davelaar mes a bisa ku esei no ta e solushon. Direktiva PNP, Humphrey Davelaar i Balborda a keda di reuní e djamars mèrdia ei pa trata e situashon agudo aki. E minister ta bisa ku ora e tabata na kaminda pa bai e reunion, un parlamentario a yam’é i informe ku señor Davelaar a informá nan ku e no ta sostené minister Balborda mas. Mas lat den dia el a haña un email den kual señor Davelaar a informe ku e ta dunami te ku siguiente dia 12or pa bai entrega retiro sino e ta bai reunion públiko di Parlamento pa bah’é. Balborda ta bisa, e no a kumpli ku e ultimatum pasombra e tabata kier klaridat. Ainda no ta kla pe, dikon a rechasá su oferta pa e tuma retiro, pa despues den ménos ku un siman kita sosten for di dje komo minister. Tempu lo mester revelá dikon e mes no tabatin mag di tuma retiro. Balborda ta bisa kue ta lamentá tambe ku e proseso pa kita sosten for di dje a bai kompaña ku intento di difamashon ku a inkluí entre otro insinuashonnan tokante un tereno pa su tio. E ta splika ku asta komo prekoushon, el a pidi i risibí konseho adishonal ku a konfirmá ku nada straño no a tuma lugá. Via di lei di LOB tur siudadano por buska i haña detaye di e transakshon aki. Balborda ta finalisá bisando ku pueblo no a skohe pe, pero e si a skohe pueblo. Ta p’esei 26 luna el a traha ku man i konsenshi limpi i trankil pa e karanan deskonosí i tímido ku kuchikuchi tur kaminda tabata bisé: “Balborda Bo ta MI minister.” Danki pa boso tur su konfiansa. E ta gradesido pa e sosten ku el a risibí den e último dianan. E ta lamentá di mester tabata protagonista den e kapítulo suku aki di polítika di Kòrsou. E ta bisa ku e ta sali for di gobernashon mas fuerte i mihó ekipá pa sigui sirbi Kòrsou. E lo buska i haña otro manera pa bolbe sirbi e pueblo ku meresé un oportunidat hustu.
Bron: Extra