Extra | Awe korte lo trata kaso tripel asesinato Campo alegre

Awe korte lo trata kaso tripel asesinato Campo alegre

WILLEMSTAD. – Kaso tripel asesinato na Kampo Alegre lo keda trata awe den su kontenido den korte di apelashon. Esaki despues ku el a keda presentá pa di 3 bia den pro forma.

Ta trata di e kaso kaminda e víktimanan R. Emerenciana, I. Rosa i C. Leonard a pèrdè nan bida, despues ku algun tipo a los tiru riba nan ku arma di kandela dia 24 di yüli aña pasa, na momento ku nan tabata saliendo for di e sentro di prostitushon.

Pa ku esaki e akusadonan Shurickson Thomasa (21) i Giovanny Geertuida (27) a keda sospechá di ta esnan envolví den e tiroteo.

Durante nan aresto dia 27 yüli Polis a haña Giovanny ku un Glock den su poder i Shurickson tabatin un pistol Sterling Mark 380 kaliber.

Durante e último kaso den pro forma hues a bisa ku ainda tabata falta mas investigashon.

Segun hues e instituto di NFI mester hasi èkstra investigashon riba e kashinan di bala.

Tambe hues a bisa ku mester a interogá 3 testigu mas, pero mester hasi esaki ku e mapa ku ta ilustrá Campo Alegre pa asina e testigunan mustra kiko nan a mira e anochi ei i na unda.

Mas aleu hues a duna di konos’é ku e testigu di fam M. mester bolbe wòrdu skucha, pa motibu ku no tabata muchu kla e deklarashon ku el a duna di e kolo di paña ku e anochi ei el a bisa di a mira Geertruida kuné bisti.

Segun e relato di hues, M. a deklará ku el a tende ku un tal Bomba tambe por tabata un di esnan ku a tira.

El a menshoná algun sospechoso mas pero te ainda no tabatin nada konkreto.

Hues a bisa ku e ke tur informashon di e telefònnan di ámbos akusado i tambe informashon di e mastnan di señal di telefòn.

Awe ta premirá ku sala lo ta bastante yen i ku hopi tenshon.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *