WILLEMSTAD. – Awe Korte Superior lo dikta fayo den e petishon ku Direktor di Banko Sentral Sr. Emsley Tromp a entrega kontra di e “dagvaarding” entrega na su persona. Siman pasá Korte a trata e opheshon i awe korte lo tuma un desishon den esaki.

Manera ta konosí dia 25 di yüli benidero, ta planiá pa kuminsá trata e kaso penal kontra di Tromp. E promé seshon aki ta un seshon preliminario (regiezitting”, kaminda ku partidonan ta bin huntu pa diskutí e “dagvaarding” i kada partido ta bin ku nan eksigensianan di investigashon, manera tendementu di testigu etcetera.

Tromp ta keda akusá di a kometé entre otro froude di belasting. Tromp ku semper a para ariba ku e ta inosente den e loke ku Ministerio Públiko ta sospech’é di dje, a entregá un opheshon p’asina trata di kita e kaso aki for di riba su lomba. Ku e akshon aki Tromp ke evitá un tratamentu den Korte Penal di Promé Instansia. E echo ku tin un “dagvaarding” kontra di un Presidente Direktor di Banko Sentral, ta nifiká ku Ministerio Públiko ta konvensí ku Tromp a kometé aktonan kastigabel.

Si Ministerio Públiko haña rason, e fecha di tratamentu di e kaso su kontenido ta bai dependé si tin mas deseo pa mas investigashon. Ta trata aki di e investigashon Saffier ku a inisiá na 2016 serka e Team Anti-korpushon (TBO). Den kuadro di e investigashon a tene algun entrada hudisial, entre otro na Banko Sentral i na kas di e sospechoso. A skucha testigu i a risibí dokumentashon for di eksterior.

E investigashon a kondusí entre otro na Tromp ku deliberadamente no a hasi menshon na Servisio di belasting di entradanan di su ‘pensioenopbouw’ ku el a risibí durante e periodo di 2006 te ku 2014. Esaki ta aló ménos e loke ku ta akus’é di dje. Dor di esaki pais Kòrsou a pèrdè di gana alrededor di 5.5 mion florin. E parti aki di e investigashon a terminá i a kondusí na e dagfar pa 25 di yüli. E investigashon penal na e sobrá echosnan ta kontinuá, Mas despues ta tuma un desishon pa persiguishon penal.

Bron: Extra