WILLEMSTAD.- Korte di promé instansia awe lo diktá sentensia den un di e tantísimo kasonan lamentabel di mishimentu ku mucha. Ta trata di un kaso kaminda un tata di kriansa ta keda akusá pa a mishi ku dos yu hòmber di su señora.

Fiskal Forbuis –Vicento a demandá e hòmber H. C. di 61 aña na un kastigu di 6 aña di prizòn pa aktonan di inmoralidat. Ta trata di un akusado ku ta pretendé di ta pertenesé na un religion i ta bisa ku su Dios sa ku e ta inosente.

Ta hopi lamentabel ora ku ta mira hendenan ku ta pretendé di ta fielnan di Dios, para dilanti hues pa aktonan di mishimentu ku mucha. Un di e víktimanan tabata den sala i a pidi daño perhuisio di 6 mil florin via di Slacht offerhulp. E akusado durante tratamentu a ninga tur e akusashonnan ku Ministerio Públiko tabatin kontra dje. El a bisa ku nunka e no a mishi ku e muchanan ni tampoko no a intentá di hasi esaki. Hues a relatá ku un di e víktimanan a deklará na polis, ku e hòmber ku ta kasa ku nan mama tabata warda e sra. bai traha pa e kometé su aktonan. E tabata pone un di nan drumi riba kama den sierto posishon i pone hasi sèks oral.

Tambe e tabata penetrá parti patras, òf kometé aktonan inmoral. E víktima a deklará mas aleu, ku e akusado tabata siñ’e landa a kambio di hasi sex kuné. Despues di siña landa e tabata tene relashon seksual kuné den un vehíkulo di kompania renombrá kaminda e akusado tabata traha. Segun e víktima, ora ku e tabatin kos di hunga, e hòmber tabata kita esakinan for di dje, i e mester a baila sunú pa e haña su kosnan bek. Tabatin un biaha ku e hòmber a dun’e un black berry a kambio di sex. E akusado a ninga tur esakinan.

Segun hues na polis e hòmber a atmití su kulpabilidat. El a bisa ku vários biaha el a trata na penetrá pero no tabata logra debí ku e no por haña su erekshon manera mester ta. Tambe el a bisa ku e no tabata su mes ora ku e tabata kometé e aktonan aki, i ku ta satanas a drent’e. Den su último palabra e akusado a yora i a bisa ku e ke ta na pas ku su famia i ku Jehova Dios sa kuantu kos el a pasa.

Abogado di e akusado mr Osepa a pidi “vrijspraak“ pa su kliente. Segun abogado su kliente no por bin na erekshon mirando e malesanan ku e ta sufri di dje. E abogado a bisa ku su kliente ta tene su mes hopi na beibel i ku e ta inosente. Ta interesante pa tende kiko hues a saka for di e kaso aki.

Bron: Extra