Di 21 pa 25 di febrüari 2017 ta tuma lugá e di diessinku konferensia di OCT- EU na Aruba. OCT – EU ta e asosashon di kua paisnan i teritorionan den otro parti di mundu i paisnan di Union Europeo ta forma parti.
Tópikonan ku lo ser trata durante di e konferensia ta; energia renobabel, kon lo bai atendé ku riesgonan di kambio di klima global i relashonnan entre e paisnan despues di salida di Inglatera for di Union Europeo. Durante e konferensia lo tin tambe reunionnan entre e promé ministernan di e paisnan miembro huntu ku representantenan ofishal di nan respektivo gobièrnu.
Na e konferensia ta partisipando entre otro Promé Minister di Aruba sr. Mike Eman, Promé Minister di St. Maarten, sr. Marlin, Promé Minister di Kòrsou sr. Hensley Koeiman i Minister Plasterk di Hulanda.
Minister Presidènt Koeiman den oranan di mèrdia a tene un diskurso.
Riba e foto nos por mira Minister Koeiman huntu ku Minister Presidènt Mike Eman i William Marlin. Minister Presidènt Koeiman a regresá Kòrsou djamars anochi mes pa kumpli ku demas obligashonnan aki na Kòrsou.
Delegashon di Kòrsou banda di nos promé minister i nos Minister Plenipotensiario na Hulanda sra. Eunice Eisden ta konsistí tambe di sra. Ann Philipps, Direktora di gabinete di Minister plenipotensiario na Hulanda, sra. Judric Pietersz – konsehero di Minister pa Asuntunan General, sra. Vanessa Dijsseldonk eksperto na departamento di relashonnan Eksterior, sr. Irving Moeniralam konsehero pa asuntunan polítiko i sr. Kenneth de Haseth, hefe di protokòl.
Bron: Persbericht regering Curacao