WILLEMSTAD. – Siman pasá tabatin un reunion general ku trahadónan di Venetto kaminda ku a informá nan di e situashon finansiero i tambe e preshon ku tin di parti di belasting riba nan. E situashon ta difísil i ta buskando forma kon pa evitá retiro.

Segun a bin dilanti, medida mester tuma lugá i den e reunion ei e sindikato ku ta representá e trahadónan den e sektor di horeca tambe tabata presente.

E sindikato Horecaf a trese dilanti ku nan lo ke duna un man pa wak kon por suavisá e preshon ku tin riba lomba di gerensia di Venetto p’asina por evitá ku nan ta bai tuma desishonnan in-apropiá.
E loke ku a bin dilanti ta ku, ta wardando riba kontakto ku a keda hasí e siman ku a kaba, pa wak kon huntu por sinta i yega na solushon pa baha e preshon ku tin.

Manera a bin dilanti, ku gerensia no tin niun kaminda mas pa bai ku únikamente di atendé ku personal i esei lo ta e último rekurso ku e sindikato ke.

E sindikato no ke tende tokante retiro, pero mester buska e solushon pa e situashon finansiero otro kaminda.
Tur e trahadónan tin nan famia i kosnan di hasi i p’esei Horecaf ke hasi tur loke ku ta na nan alkanse pa duna un man pa suavisá e preshon ku tin riba gerensia di Venetto.

E loke ku Horecaf ta tratando i buskando aserkamentu nan ku e diferente sektornan di interes, pa Venetto por wanta tur kos un ratu te ora yega na un solushon.

E loke ku por tuma lugá awor, ta esunnan ku boluntariamente ke bai, por bai, pero no ku preshon pa kita niun hende for di trabou.

P’esei Horecaf a bisa durante reunion ku nan no ke pániko pa motibu ku ta trahando duru pa yega na un solushon.
Extra a trata di drenta den kontakto ku Presidente di Horecaf, pero esei no a resultá, pa motibu ku e presidente ta den situashon di luto.

Bron: Extra