WILLEMSTAD.- Presidente di partido MAN Emile Wallé ta enfatisá ku pa e partido blou ta importante pa sigui traha ku e kuater partido ku a firma un akuerdo di disponibilidat dia 10 di òktober.

‘Awor nos tin 12 asiento. Ta sufisiente pa un gobièrnu. Si ta posibel nos ke amplia e basa te 14 asiento den parlamento.”

Dia 10 di òktober MAN a firma un deklarashon di disponibilidat, huntu ku partidonan PAR, PNP i PS, kual ta un base di 12 asiento.

Esaki ta un mayoria apsoluto pa yega na un gobièrnu nobo. Den nan akuerdo tur e partido a deklará tambe ku nan no ta ekskluí ampliashon ku mas asiento.

Ayera korant EXTRA a skirbi ku partido MAN ta deseá un gobernashon ku 2/3 parti di parlamento. Ku ta 14 asiento, òf mas. Supuestamente e parti ‘òf mas’ ta kousa pa hopi nèrviosidat den e tim di negoshadó di e kuater partidonan. Partidonan MAN, PAR, PNP i PS huntu tin 12 asiento den total. Partidonan Un Kòrsou Hustu tin 1 asiento, Movementu Progresivo tambe tin 1 asiento. Si e dos partidonan lo amplia e koalishon, ta nifiká ku nan tin 14 asiento. Segun fuentenan den e proseso no tin niun motibu pa aserká otro partidonan tambe.

MAN ta di opinion ku, pa garantisá gobernashon stabil pa e próksimo 4 aña i tambe kumpli ku e retonan grandi ku tin para nos dilanti, ta nesesario pa hasi máksimo esfuerso pa trata na yega na un gobernashon ku sosten di 2/3 parti di parlamento. Ku ta 14 asiento.

‘MAN for di prinsipio ta partidario di un gobièrnu mas amplio; pa por hasi ahustenan den Areglo di Estado, pa traha a base di Inklushon di tur gremio, pa tin Stabilidat i Konfiansa, i ku tin forsa pa saka Pais for di e situashon ku e ta den.”

Bron; Extra