WILLEMSTAD,- ‘Ora nan a drenta den mi kas no tabatin nada buta riba papel, nada konkreto. Sr. Christiaan ku a drenta mi kas, huntu ku e otro personanan, no por a bisa mi nada tampoko pa ki motibu nan a hasi e entrada.’

Asina lider di MFK Gerrit Schotte a deklará na prensa awe mainta. ‘Christiaan ta un persona ku a bai skol ku mi ora nos tabatin chiki. Pero awor e tin un mentalidat ku nos ta otro tipo di hende, inferior na esun kolo kla.’

Schotte: ‘Na promé instansia ela duna mi un papel ku ta menshoná ‘strafbare feiten’ en ‘vernoemde vordering’ pero no por splika kiko esaki ta nifiká. Remarkabel ta ku na final di entrada, 45 minüt despues ku nan a drenta mi kas, nan a bisa mi ku mi ta sospechoso den e kaso.’ E papel ku nan a duna Schotte no ta bisa nada tokante e echonan kastigabel, segun e lider di MFK. ‘Pero nos ta konosé e wega. Nan ta drenta bo kas. Nan a bin pa kaso A. Pero por ta ku durante entrada hudisial nan ta mira algu ku na nan opinion ta mas interesante. Anto despues nan ta drecha e kos ku nan no a buta riba papel. Asina nan a traha. Un wega e ta.’

Segun Schotte minister-president Gilmar ‘Pik Pisas’ djamars a entrega un aanwijzing den man di procureur-generaal Guus Schraam. ‘Ku ta bisa: ‘basta ku e kos ku bosnan ta hasi’ i kuminsá pa investigá e kriminalidat ku violensia. Si tur persona uniformá den e pais aki tabata persiguí realmente kiko ta kriminalidat den e pais aki, e ‘zware criminaliteit’, opviamente nan lo no tin tempu pa hasi e kos manera nan a hasi ku e entrada hudisial den mi kas.’

Schotte: ’Un kos ta hasiendo den marinebasis i den edifisio di Ministerio Públiko. Nan ta prepará un plan, kada dia di nobo, kon nan ta atendé ku e lider polítiko di Movementu Futuro Kòrsou, huntu ku su ekipo. Ku ta sigui e ruta ku un agènda pa pueblo, huntu ku pueblo. Pa nos por demonstrá ku realmente den e pais aki kosnan diferente por tuma lugá pa pueblo por progresá den bo bida.’

Bron: Extra