WILLEMSTAD.- Nuebe parlamentario di Parlamento di Kòrsou ke reuní awe tokante retiro di Presidente di Parlamento i elekshon di un presidente di Parlamento nobo huntu ku un visepresidente di Parlamento.

Nan a manda un karta pa esaki na presidente di Parlamento aktual Humphrey Davelaar.

Tambe e nuebe parlamentarionan (ku ta tur 4 miembro di frakshon di MFK, tur 3 miembro di frakshon di Kòrsou di Nos Tur, parlamentario pa Movementu Progresivo Marilyn Moses i parlamentario independiente Eduard Braam) ke debatí tokante akuerdo di gobièrnu di gabinete Koeiman. Segun e karta chèns ta grandi ku no tin un mayoria di Parlamento ku ta sostené e akuerdo, manera ta menshoná di artíkulo 29, insiso 2 di Areglo di Estado.

Den e karta e nuebe parlamentarionan ta skibi ku na e momentu aki nan tin un mayoria den Parlamento. Nan a manda e karta di 24 di desèmber i ta pidi pa un reunion riba no mas lat ku dia 27 di desèmber. Ku esaki nan ta usa artíkulo 64, insiso 4 di Regalamentu di òrdu di Parlamento di Kòrsou.

E miembronan ta splika ku e karakter di urgensia ta basá riba preokupashon di e miembronan ku a firma e karta ku no tin sufisiente sosten den Parlamento pa gabinete Koeiman. Esaki tin di aber ku djabièrnè 23 di desèmber 7 miembro di Parlamento a keda huramentá komo minister.

Den e karta tin skibí ku: ‘Voor de goede orde’ tur firmadó ta splika ku e reunionaktual di Parlamento di Kòrsou ta konsistí di 14 miembro. P’esei quorum di un reunion riba 27 di desèmber ta di 8 miembro”.

Bron: Extra