WILLEMSTAD.- Tin un inkietut ta biba bou di trahadónan di kontratista riba tereno di refineria Isla. E trahadónan ta bou di e impreshon ku di un forma òf otro ta trese trahadónan estranhero, prinsipalmente Venezolano pa traha sin ku tin e pèrmit nesesario pa esaki.

Esaki tabata motibu kaba pa un reunion siman pasa djabièrnè entre e sindikato SGTK, Minister di Labor Hensley Koeiman (MAN) i e asosashon di kontratistanan AAV. Presidente di SGTK, Alcides Cova a duna di konosé ku mester bini mihó kòntròl.

Pa e motibu aki tambe a solisitá un di dos reunion ku e Minister pa wak kon por logra yega na un mihó sistema di kòntròl. Pensamentu ta ku e komishon ku ta evaluá tur petishon pa buska trahadó estranhero mester hiba e kòntròl aki.

Tin un komishon den kua sindikato, Gobièrnu, kontratistanan i Refineria Isla ta sinta huntu. E komishon aki ta evaluá tur petishon ku drenta pa buska trahadónan den eksterior. Ta evaluá promé si no tin sufisiente trahadó lokal pa hasi e trabou.

Pero apesar di e komishon aki, ta biba e pensamentu serka e trahadónan ku di un forma òf otro tòg ta logra buska trahadónan estranhero sin ku e komishon ta na haltura di dje. Resientemente tabatin un kaso tambe di un kontratista ku a haña trabou pa renobashon di e planta Crude Distiller 3 i ku a hasi petishon pa buska un kantidat di trahadó for di Venezuela miéntras ku tabatin trahadó na Kòrsou pa hasi e trabou.

A sinta resolvé e situashon aki pero tòg ke hiba un mihó kontròl pa evitá ku di un forma òf otro ta buska trahadónan den eksterior, Cova a bisa. El a pensa riba un sistema kaminda ta tene e kontratista ku ta haña pèrmit pa buska trahadó den eksterior responsabel pa sòru ku e trahadó aki ta regresá su pais. Di e forma ei te evitá ku e trahadó, despues di a kumpli ku e trabou ku el a bini traha, ta keda kologá na Kòrsou i haña otro trabou pa hasi.

Bron: Extra