WILLEMSTAD.- Despues di a keda kondená na un kastigu di 10 aña pa intento di asesinato, eks agente polisial Zeno Inecia mester presentá den korte mayan pa otro akusashon. Ministerio Públiko e biaha aki ta akusá Inecia pa ladronisia di un òf mas portofon den e periodo di 3 pa 7 di febrüari 2016.

E ta keda akusá di a hòrta e portofonnan fo’i warda polis Punda i òf Montaña. Despues di a sospechá e akusado di a hasi mal uzo di e portofonnan na tersera, a pon’e riba non aktivo pa kaba di hasi investigashon. Netamente den e temporada aki, Inecia su telefòn tabata di tap kaminda nan a sospech’é tambe di ta den un atrako den un bibienda abase di algun kombersashon, pero no tabatin sufisiente prueba den e kaso aki kontra dje.

Durante e investigashon outoridatnan a bin sigui un kombersashon di nan eks kolega i un hòmber di fam Fransisca ku tabata suministr’é tur informashon i posishon di e víktima Bernadina di kual el a skonde tapa kara i tira riba dje. Mayan e akusado un biaha mas mester bolbe presentá na korte pa ladronisia di portofon di polis.

Bron: Extra