WILLEMSTAD,- Grefir di Parlamento di Kòrsou Silvin Cijntje ayera a manda un konvokashon pa un reunion públiko di Parlamento djabièrnè awor 2 ‘or.

Riba agènda ta e siguiente puntonan: ‘Deliberashon ku Promé Minister enkuanto desishon di gabinete Koeiman pa konvoká elekshon 28 di aprel 2017 despues ku a disolvé Staten’ i ‘Deliberashon ku Promé Minister enkuanto karta ku number 2017/7597 fechá 20 di febrüari 2017 ku asina yama ’lopende zaken’.’ E punto tabata riba agènda di reunion di 23 di febrüari ku a keda di skors despues di insidente entre Jacinta Constancia i Giselle Mc William a tuma lugá.

Den mundu polítiko di Kòrsou tin diferente persona ku ta puntra kiko ta e motibu pa te ainda Constancia ta keda sera. Segun algun di nan detenshon di Constancia por influensia reunionnan di parlamento. Constancia a duna di konosé despues di insidente di siman pasá ku e lo distansia su mes for di partido MFK i entrega su asiento, ku ta habri posibilidat pa Amerigo Thodé por bira parlamentario pa MFK. Pero te momentu ku Constancia ta den libertat, Thodé no por keda nombrá.

Pa kolmo Sherwin Leonora parlamentario di Pueblo Soberano siman pasá a bai riba un krusero pa un periodo di fakansi.

Sin Thodé i Leonora e bloke di frakshonnan di MFK, Kòrsou di Nos Tur, Pueblo Soberano, Movementu progresivo i parlamentarionan independiente Eduard Braam i Gassan Dannawi no tin mayoria den parlamento.

Bron: Extra