WILLEMSTAD.- Aki poko dia alumnonan lo por broma ku nan a bai i sigui e programa di Gregory Elias Entertainment Management.
Esaki tabata un anunsio ku a keda hasí kaminda nos Gregory Elias konosí pa diferente proyekto den komunidat entre otro CNSJF, ta brinda e oportunidat a hóbennan rònt mundu por tuma parti na e Elias Program ku ta sinónimo di e lider den industria di entretenimentu. E programa a kuminsá na ougùstùs último i ta pertenesé na Rosen College òf Hospitality Management di UCF College òf Arts and Humanities na Florida.
Riba wèpsait di Rosen College ta bisa ku Gregory Elias a nasé na Kòrsou i a traha komo abogado i empresario. Pa henter su bida Elias tabatin i tin interes pa músika i arte.
Su pashon pa filantropía i e ròl ku entretenimentu por hunga pa uni hende ta forma base di e kolaborashon ku Rosen College. E instituto a traha un ‘undergraduate program’ pa desaroyo futuro lider den industria di entretenimentu. Ku e estudio nan por haña e título ‘Bachelor of Science in Entertainment Management’.
Den e vishon di Elias den industria di entretenimentu mester tin mas hende eduká, individualnan kreativo ku ta prepará pa dil ku retonan di futuro i ku por krea un mundu mas mihó i mas harmonioso. Esaki por keda hasi dor kultura i arte.
Riba wèpsait di Rosen College por mira ku Elias a kontribuí hopi sèn pa e programa. Segun Elias ta importante pa hende ku ta bai traha den mundu di entretenimentu ku nan por ta kreativo. ‘Ora bo ta skucha un kantika bunita òf wak un pintamentu hopi speshal e ta elevá bo.”
Bron: Extra